12 Jun 2019 10:21

inkhel

Champions League khel thei lo turin City an hrem tep

Manchester City chuan UEFA in Champions League khel thei lo tura hrem an tumna chu khing let mahse Europe khawmualpuia inelna sang bera tel thei lo dinhmunah an ding hnai hle.

UEFA chuan Manchester City sum dinhmun an zir chiang a, Financial Fair Play dan an bawhchhe ngei nia an hriat avangin Premier League champion te hi hrem an tum phah a ni.

Europe khawmualpuia football khaikhawmtu lian UEFA chuan Financial Fair Play Regulation (FFP) hi an hmang chho a, club hrang hrang neitute’n an duh ang anga pawisa an hman loh nan kalphung felfai tak an duang a. Dinhmun rualkhai deuh zawka an awm theih nan tiin he ruahmanna hi an hmang tan a, he dan bawhchhiate chungah na takin hremna an lek kawh thin a ni.

FFP inkaihhruaina chungchang hi Manchester City pawhin an zawm famkim lo niin UEFA thuneitute chuan an sawi a, hei vang hian UEFA Champions League khelhtir loh hi an tum phah a, City chuan an khing let rang hle.

The Sun chanchinbuin an tarlan dan chuan Manchester City in Court of Arbitration for Sport (CAS) hnena UEFA thutlukna an khin let chuan awmzia a nei thui lo hle a. Tun atanga kar hnih khat a liam leh hunah thutlukna chu tih chhuah a nih an rin thu tarlangin, Europe khawmualpuia inelna sang bera Manchester City tel phal lohna thu hi a chhuah theih a rinawm tawh niin an tarlang..

UEFA hnuaia Club Financial Control Body a Adjudicatory Chamber thupuangtu chuan, “UEFA chuan thutlukna an siam fel tawh a, a hma thei ang bera hman tur a ni a. Hetih lai hian Court of Arbitration for Sport chuan hemi chungchang hi an buaipui mek a. Thu tawp an siam hunah chuan a nih tur ang ang kan ni zui ang,” a ti.

Kar hmasaah khan CAS chuan Manchester City hnen atangin UEFA thutlukna khin letna thu hi an dawng tih an puang a, UEFA leh Manchester City te hnen atanga lehkha an dawn te chu an zir chiang ve ve a ni.