Real Madrid striker Karim Benzema chuan nizanah khan UEFA Champions League goal khat a thun a, Europe khawmualpuia inelna sang berah goal thun hnem lamah palina a ni.

Real Madrid leh Chelsea te chu nizanah khan Champions League semi final first leg-ah an inhmachhawn a, he inkhelah hian Benzema chuan mawi deuhin goal a thun a, 1-1 in an inhnehtawk theih phah a ni.

Nizana a goal thun kha Champions League bikah Benzema hian goal 71 a thunna chiah niin, hetiang zat goal thun thei tur hian game 129 a mamawh a. Real Madrid striker hlui Raul nen an goal thun zat a inang chiah a, Benzema hian goal 71 thun turin game a khel tlem zawk daih a ni.

Cristiano Ronaldo chu Champions League goal khung hnem ber a la ni mek a, game 176 khelhah goal 134 lai a thun thei a. Pahnihnaah chuan Lionel Messi a awm a, Argentine star hian game 149 khelhah goal 120 a thun tawh bawk a ni.

Bayern Munich striker Robert Lewandowski chu pathumnaah a awm a, Poland striker hian Champions League game 96 khelhah goal 73 a thun tawh a. A hnuaiah hian Karim Benzema leh Raul te chu an awm ve leh bawk a, goal 71 thun tur hian Benzema chuan game 129 a khel a, Raul hian game 142 a khel thung.

Ruud van Nistelrooy chu paruknaah a awm a, Manchester United striker hlui hian game 73 khelhah goal 56 a thun hman a. A hnuai chiahah hian Arsenal striker hlui Thierry Henry a awm a, game 112 khelhah goal 50 a thun.

1956 leh 1960 inkara a zawna vawi nga ngawt Real Madrid chu European Cup title lakpuitu, Argentine forward Alfredo di Stefano chu pariatnaah a awm a, a vanglaiin Di Stefano hian game 58 khelhah goal 49 a thun hman a ni.

AC Milan striker hlui pahnih chu pakuana leh sawmnaah an awm a, Andriy Shevchenko chu pakuana niin, game 100 khelhah goal 48 a thun thei a. A hnuai chiahah hian Zlatan Ibrahimovic awmin, Swedish striker hian game 120 khelhah goal 48 a thun tawh bawk a ni.