01 Jun 2019 02:30

inkhel

Champions League final thlir kualna

Zaninah European champion a chiang tawh dawn a, Madrid khawpuiah Liverpool leh Tottenham Hotspur te chuan UEFA Champions League final an khel ang a, chak zawk an awm ngei ngei a ngai a. A thiam ber ti chiang turin Wanda Metropolitano stadium-ah season khat chhunga game lian ber mai chu Premier League club pahnihin an khel ang.

European Cup an tih thin, UEFA Champions League tia a hming an thlak hnuah phei chuan football ngainatute’n an ngaihhlut ber mai niin, khawvel ram hrang hrang 200 vela mi maktaduai 350 chuang zetin an thlir thin a ni.

Khelmualah player te’n theihtawp an chhuah ang a, goal thun hnem zawk nih ngei an tum dawn a. Hetih rual hian club thuneitu lampang chuan an sum hai luh theih tur an lo suangtuah ve thung dawn a. Stadium thar sa zo hlim Tottenham tan phei chuan sum duhthawh hi a na lehzual viau dawn a ni.

UEFA chuan 2018-19 Champions League sum dawn tur hi nikum June thlaah an lo puang daih tawh a, champion team chuan €19 million (£16.8 million/$21.2 million) an dawng ang a, final-a chak lo zawkte chuan €15 million an dawng dawn bawk a ni.

Club pahnihte hian final an luhna kawngah sum tam tham tak chu an la lut der tawh a. Group stage khel thei tura an tlin khan €15.25 million an dawng nghal a, knockout stage an khelh chhoh khan €9.5 million atanga €15 million vel an dawng chho a, a vaiin €32 million vel zet chu an hai lut tawh a ni.

Group stage-a point an hmuh dan behchhan khan pawisa an dawng bawk a, point khat zel kha €900,000 hu vel niin, Liverpool chuan €8.1 million an dawng thei a, Tottenham chuan €7.2 million vel an dawng thei bawk a ni.

Jurgen Klopp leh a pawlte an champion a nih chuan a pumpuiah €74.35 million zet an hawn thei dawn a, Mauricio Pochettino leh a pawlte an chak a nih chuan €73.45 million vel an hawn thei dawn bawk ang.

2018 UEFA Super Cup khel tura tling Real Madrid leh Atletico Madrid te chuan €3.5 million an dawn bakah, a chak zawkin €1 million an dawn belh bawk a ni.

Champions League final leh number thenkhatte:

9 - Liverpool chuan European Cup/Champions League final vawi 9 an khel dawn chiah a, English club zingah chuan khel hnem ber an ni a. Heng zinga vawi 5-ah hian an champion tawh a ni.

5 - Tottenham chuan Champions League final an luh hmasak ber tum an tawng mek a. A hmain final an luh hmasak ber tumin club panga (Chelsea 2008, Arsenal 2006, Monaco 2004, Bayer Leverkusen 2002 leh Valencia 2000) te chu an lo tlawm tawh a ni.

21 - Liverpool tan Trent Alexander-Arnold chuan bul a tan a nih chuan player zingah kum 21 hnuai lam ni chunga Champions League final-ah a kum zawna bul tan thei hmasa ber a ni ang. A hmaa hetiang ti thei naupang ber chu Christian Panucci niin, 1994 leh 1995 khan AC Milan tan final a khel a ni.

16 - Lucas Moura chuan semi final-ah Ajax lakah hattrick a siam a, final an luh theih phah a. Champions League bika a hmaa vawi 16 a inlan tawha goal a thun (goal 2) aiin kha inkhela goal a thun kha a tam zawk a ni.

3 - Jurgen Klopp chuan Champions League final vawi 3 a lut ta a, 2013 khan Borussia Dortmund chu final a luhpui a, 2018 ah Liverpool chu final a luhpui bawk a, a hmasa pahnihah hian a la chak lo ve ve a. Marcello Lippi (1997, 1998 & 2003 -Juventus) kha coach zingah European Cup/Champions League final-ah a zawna vawi thum tlawm awm chhun a ni.

1982 - Liverpool leh Tottenham te chu final lian thamah vawi khat chiah a hmain an la intawng a, 1982 kumah khan Wembley-ah League Cup final an khel a. Hemi tum hian Liverpool chuan hun tawp dawnah an si phurh an sut a, hun pek belhah 3-1 in an chak zui a ni.