Argentine winger Di Maria chuan Champions League-a PSG tan a inlan hmasak berah goal a khung nghal a, tan atanga minute 4-na lekah Malmo lamah goal mawi tak khungin tun season Champions League Group Stage-a goal khung hmasa ber a ni nghe nghe.
PSG hian si hnih faiin Malmo an hneh a, Di Maria chuan mawi takin a thuai goal, Malmo goalkeeper Johan Wiland tan tihngaihna a awm lo, second half 61st mins-ah Cavani chuan PSG goal hnihna a khung a, si hnih faiin PSG chuan hnehna an chang.
Season hmasa khan Manchester Unied chuan Real Madrid atangin Di Maria hi British club record fee-in an lalut a, mahse Van Gaal-a hnuaiah erawh Di Maria a che fuh thei lo. Van Gaal-a'n a chhawr thiam lo zawk nge ? PSG tan erawh tha takin a khel nghal thei tlat bawk si. Di Maria chuan tun season Champions League khelh ngei a tum thu a sawi chhuak a.
Season thum chhung PSG hian quarter final bak an pel thei lo, season liamta khan Barcelona hneh lovin quarter final-ah an tla a nih kha.
"Pen khat te tea kal kan tum ang, tun dinhmunah hian PSG hi dinhmun tha takah a ding chho mek a. Quarter final paltlanga final khelh ngei kan tum a ni. Theih tawp kan chhuah anga, kan hlawhtlin ngei pawh ka ring tlat a ni," tiin Di Maria chuan a sawi.
Nizan match an khelh hma khan Di Maria chuan Champions League TV atanga en hrehawm a tih thu a lo sawi tawh a nih kha. Tin, PSG zawm kha a chak ber ni mahse FFP vanga Manchester United a zawm hmasak tak thu a sawi tel nghe nghe.
PSG hian Ligue 1 season bul an tan tha hle a, hneh loh an la tawng lo, hmahruaitu an ni mek bawk a, tun weekend hian pathumna ni mek Reims an hmachhawn dawn a ni.