Cardiff-a Champions League final-ah Real Madrid chuan 4-1 in Juventus an hneh a, a zawnin Real Madrid chu UCL champion an ni ta. Real Madrid hi title humhim thei hmasa ber an nih bakah European Cup/Champions League title a vawi 12 nan an chawi ta a ni.
Final-a goal hnih khungtu Ronaldo chuan record thar a siam a, Champions League Era-ah final vawi 3-ah goal a khung vek, hetianga ti thei mi dang an la awm lo. Tin, Ronaldo hian Champions League-ah goal 105 a khung ta a, European Competition-ah goal 108 a khung ta bawk. Tun season Champions League-ah goal 12 khungin top scorer a ni ta a ni.
Juventus 1-4 Real Madrid
(Mandzukic 27') (Ronaldo 20', 64', Casemiro 61', Asensio 90' )
Juventus XI : Buffon; Barzagli, Chiellieni, Bonucci, Sandro; Pjanic, Khedira; Alves, Dybala, Mandzukic; Higuain.
Real Madrid XI: Navas; Carvajal, Ramos, Varane, Marcelo; Kroos, Casemiro, Modric; Isco, Benzema, Ronaldo.
Zidane chuan Bale bench-ah thuttirin Isco chu a start tir a, 4-3-1-2 formation hmangin Ronaldo leh Benzema te chu hmatawngah a dah. Allegri chuan 4-2-3-1 formation a hmang a, Higuain chu hmatawngah a dah a.
First half tir atangin game a tang nghal. Juventus chuan an nawr nghal a, Pjanic chuan box pawn atangin a hlap, lei hrulah a goal tawh dawn emaw tih laiin Navas chuan a kut dinglamin a lo dang hman, save ropui tak a ni.
20 mins-ah Real Madrid chuan Ronaldo hmangin goal an khung a, Box dinglam sir atanga Carvajal cross chu box chhung atang chuan Ronaldo chuan bottom corner-ah chiang takin a pet goal ta a, Real Madrid chuan Champions League-ah goal 500 an khung tling ta der mai.
Juventus an khel tha tulh tulh a, Real Madrid goal an thleng phei deuh chhen. Darkar chanve an khelh tlin hmain Mandzukic chuan Juventus siphurh a rul ta.
Sandro cross chu Higuain chuan Mandzukic tan pein, ani hian ball kang chu box chhungah chuan mawi taka lain, a bicycle kick nghal, Navas a rep mawi hle. First half a zo a, 1-1 in an inhnehtawk.
Second half tan a ni a, Juventus chuan game thunun mahse Real Madrid chuan chance hlauhawm an nei chho leh ta a, 61 mins-ah 40 yards atangin Casemiro chuan kawh zetin a shot, Khedira chuan a lo dang kawi bawk nen, Buffon chuan a ban phak lo, bottom corner-ah mawi takin a thlawk lut a, 2-1 in Real Madrid chuan hma an hruai.
Hemi hnu lawk hian Ronaldo chuan a goal hnihna a khung, mual dinglam sir atanga Modric cross tha zet chu Ronaldo chuan near post atangin cool takin a pet goal, Ronaldo hian ram leh club tan career goal 600 a khung tling ta a ni.
Hun tawp dawn minute 6 a la awm tihin bench atanga lut Cuadrado chuan Ramos a namtluk avangin yellow card pahnihna a chawi, Na lo tein a nam a, Ramos hi a thal tawp, a zia lo deuh hlek a ni. Hetih lai hian red card phawrh lo mahse game-ah Juventus tan comeback leh theih a ni tawh lo a, red card hi game ti danglam tu a ni lem lo a ni.
Hun tawp dawn tak takah mual veilam sir atangin Marcelo chuan ball mawi taka lalutin, bench atanga lo lut Asensio chu a pass a, ani hian tihsual nei miah lovin cool takin a pet goal ta a ni. Hun a zo a, Real Madrid chuan 4-1 in hnehna an chang ta a ni.
Real Madrid head coach fak loh theih a ni lo, season hnih Real Madrid a enkawl chhungin Champions League no mawi vawi hnih a chawipui. Tin, tun season liamta La Liga champions an ni bawk a, player tha tak tak kawlin duhthlan harsa tak karah pawh team a enkawl thiam em em a, chu chu a hlawhtlinpui kan ti lo thei lo.
Juventus hi tun season Champions League defending tha ber an ni a, final an khelh hmain chak loh an nei lo, tin, goal thum chiah an chhuah. Hetih lai hian final-ah erawh tun champions league-a attacking nei tha ber Real Madrid an hmachhawn. Goal 4 lai an chhuah a, Real Madrid hian tun season Champions League-ah goal 36 lai an khung a, Champions League-ah 503 an khung tling ta bawk a ni.
Ronaldo fak loh theih a ni lo, Season 5 chhung a zawnin UCL top scorer a ni ta. Euro 2016 final-ah a inhliam, kha vang khan duhthusamin season bul a tan thei lo. Tun season Champions League quarter final hma khan goal 2 chiah a khung, mahse quarter final hnuah erawh goal 10 lai a khung hem mai. Barcelona forward Lionel Messi chuan goal 11 a khung a, Ronaldo hian a khum ta chiah chiah a ni.
2017 Ballon d'Or dawng tur pawh a chiang ta hle mai, player ropui chu game level sangah an che ropui thin, Ronaldo chu level a sang tawlh tawlh a, a tlangnel tawlh tawlh a ni ber mai. Tun season Champions League-ah club lian a hmachhawnin goal a khung hnem, Bayern Munich lakah goal 5 lai a khung a, Atletico lakah goal 3 a khung a, final-ah goal 2 a khung ta bawk a ni.