Kum 2008-09 season hnuah a vawikhat nan Champions League Quarter final-ah Premier League club pali an awm a, hei hian Premier League that zia a ti lang niin Tottenham manager hlui Tim Sherwood chuan a sawia, a pawmawm viau.

Manchester City, Manchester United , Liverpool leh Tottenham-te chuan Champions League last 8 an lut veka, La Liga lam atangin Barcelona bak an dam tawh lova, Serie A atangin Juventus la damin, Porto leh Ajax-te chu Portuguese league leh Dutch league atangin Champions League last 8 an lut tawh bawk.

Hetiang tak a nih avang hian English club pakhat tal chuan semi-final an luh a rinawm a, final lut an awm lovang tih pawh a sawi theih lo. Season liamta khan Liverpool chu English club zingah che tha berin final hial an lut nghe nghe a nih kha.

Sherwood chuan The Debate a hrilh danin, “Premier League hi an tha sawt hle a, Pep Guardiola; Spain leh Germany lama hun hmang tawh pawhin England a rawn pan tirh khan Premier League that zia a sawi nghal. Premier League-a a season hmasa berah khawvela league hautak ber a nih thu a sawi a, chu chu a a ngaihdan a ni a, a dik reng bawk.

“Premier League team-te hi a mawng berah an nunna atan an khel emaw top four atan khel pawh nise eng emaw hi a awm bik a, sum a tamin player-te pawhin rawn luh an chak. Khawvela sum che vel a tam bera, tupawhin an thlir chakin, a thang mek zel bawk. Premier Legaue that zia chu Champions League quarter final-a team pali an awm atang hian a lang a ni,” a ti.