La Liga inkhelah Real Madrid chuan Los Carmenes-ah Granada an tlawha, mikhual lam Real Madrid hi 2-1 in an chaka, khelh hnih la awmah vawi khat an chak leh chuan an champion dawn.

Mual neitu lam Granada tan hian Darwin Manchis chuan goal a khunga, Real Madrid tan hian French player pahnih Ferland Mendy leh Karim Benzema te chuan goal an khung bawk.

Khelh 36-ah Real Madrid hian point 83 hlawhchhuak tawhin, Barcelona aiin point liin an sang zawka, hmahruaitu an ni chhunzawm zel. Granada hian khelh 36-ah point 50 hlawhchhuak tawhin, 10-naah an awm mek.

Mikhual lam Los Blancos hian minute sawmhnih pawh khelh a nih hma in si hnih faiin hma an hruaia, minute sawm chauh khelh a nihin Mendy chuan box chhung atangin Granada goal-ah ball a pet luta, Real Madrid hma a hruaipuiin, Los Blancos tana a goal hmasa ber a khung. Minute nga hnu velah Real hian an goal hnihna an khung leh nghala, counter-attack hmangin Real hian mual neitu lam nawrin, Benzema chuan box chhungah ball a luh puia, nalh taka finish zuiin, Real goal hnihna khungin, tun season-a a La Liga goal 19-na a ni.

Granada hi chance nei lo an ni bik lova, half time hma minute sawm velah Duarte chuan cross ball a hmuh chu Real goal-ah na takin tauh mahse Real goalkeeper Thibaut Courtois chuan tha takin a lo save. Second half tir lamah Casemiro chuan an half lamah ho taka ball hlohvin, Granada hian an huntha neih an chhawra, Manchis chuan goal khungin, an si phurh pakhat a rul. Hun tawp hnaih tawhah Granada hian an si phurh sut zawhna hun tha a zawnin nei mahse goal-ah an chan tir thei lova, 2-1 in Real Madrid hi an chak ta a ni.

Granada 1-2 Real Madrid

(Manchis 50’) (Mendy 10’, Benzema 16’)

Player Ratings

Granada - Silva 7, Foulquier 6, Diaz 5, German 6, Duarte 7, Dias 6, Vico 5, Azeez 6, Yangel 7, Fernandez 5, Machis 7. Subs - Puertas 6, Montoro 6, Koybasi 5, Eteki 5, Cortes 5.