Champion turin kan kawng a la tawp lo: Vettel

01st October 2018, 10:10PM

Sebastian Vettel chuan Formula One driver’s championship-ah Lewis Hamilton nen an inthlauhna sang viau tawh mahse a tan champion theihna kawng a la tawp bik lo tih a sawi.

Pathianni khan Russian Grand Prix-ah sawi hlawh zet mai boruak karah Lewis Hamilton chu pakhatna a ni a, a hnaih bertu Vettel nen an inthlauhna chu point 50 ngawt a ni tawh a, intlansiak vawi 5 a la awm dawn a ni.

Ferrari driver Vettel chuan tuna an dinhmun han thlir mai chuan beisei san vak theih a nih tawh hmel loh tih sawiin, an team chuan inrintawkna an nei tha a, champion thei tur hian beiseina sang tak an la neih thu a sawi a. Hma lama thil thleng tur a sawi lawk theih loh a, eng thil pawh la thleng thei a ni a, an tan kawng a la tawp lo niin a sawi a ni.

Vettel chuan intlansiak vawi 5 an la hmachhawn turah Mercedes chu an che tha vek kher lo thei tih sawiin, tlan tluanchhuah theih loh te pawh awm thut thei a nih thu sawiin, Lewis Hamilton chu tlan tluanchhuak thei lo tura a duh vang ni loin, thil awm thei a nih thu a sawi a. Chutiang thil te chu thleng ta thut se, engkim mai chu chiang sa a awm lo leh vek thei dawn niin a sawi a ni.

Sochin-a Hamilton a chak khan a zawna vawi thum a chakna a ni tawh a, intlansiak hnuhnung parukah vawi 5 chu chak ber a ni thei ta bawk a. Pathianni khan a teammate Valtteri Bottas chu team lamin radio hmangin Hamilton kian turin an hrilh a, chumi zarah chuan British driver Hamilton chu pakhatna a nih theih phah chauh a ni.

Kumin chhungin Ferrari car chu Mercedes car ai chuan a chak zawk a, mahse Ferrari hi an chet fuh loh leh thin avangin Mercedes hi an chungnun phah ta fo a. Sochi-ah kha chuan Silver Arrows an che tha hrim hrim a, qualifying atang tawhin Vettel kha chuan Hamilton leh Bottas te kha a pha lo viau tawh hrim hrim a ni.

Copyright © inkhel.com 2024. All rights reserved.