Manchester United captain hlui; tuna Sky Sports pundit ni mek Gary Neville chuan Liverpool chu champion ni thei tur khawpin an inkhel niin a sawia, engpawh la thleng thei ni mahse Liverpool chu champion turin a ring deuh ber tawh niin a lang.
Liverpool hian tun hnai kum hnih chhung velin hma an sawn hle a, season hnih liamta khan Champions League final an thlen hnuah season liamta khan final an thleng leha, final an luh hnuhnun zawkah hian an champion.
Liverpool hian season liamta khan season tawp thlengin Manchester City chu Premier League title inchuhna kawngah an uma, a tawpah point 97 lai hmu in pahnihnaah awmin, tun season-ah hneh loh la nei lo awmchhun niin point 8-in league-ah hma an hruai leh mek tawh bawk.
Liverpool hian an game hnuhnung berah league lama anmahni elpha tur ber leh um ber tura ngaih Manchester City chu 3-1 in an lo hneha, tunah hian City hi point 9 laia tlansan tawhin, an inkar a zau thawkhat tawh hle a, Sky Sports pundit dang Jose Mourinho pawhin Liverpool hi an champion tlang a rin thu a lo sawi ve tawh bawk.
Neville chuan, “Champions League nomawi chawi tur chuan team tha ve tawk tak nih a ngai a, chu mai nilovin a zawna Champions League final luta, season liamta tawp thlenga Manchester City um tur chuan team naran a nih theih loh.
“Premier League title la thei tur khawpin Liverpool hian football an khela, heti ang hian thla 18 vel liamta atang khan an khel tawh. An fal tawh hle a, mahse he an fal tawhna hi an la hloh theia, City hian an la rawn umpha thei a, Chelsea emaw Leicester hian thil mak an rawn thlen tir thut thei bawka, mahse heti ang hi a thlen a rinawm tawh loh zawk.
“Liverpool tana hlauhawm ber tawh chu Champions League-ah an inham buai lutuk emaw inhliam nasa takin a tlakbuak palh a ni a, Sadio Mane, Mohamed Salah emaw Virgil Van Dijk-te hi an inhliam palh a hlauhawm hle. An player pawimawh tak tak te thla hnih emaw vel an chhawr theih loh palh chuan a pawi dawna, City in Aymeric Laporte an chan rih ang hi a ni dawn.
“Mahse engkim hian Liverpool lam a hawi a ni ber tawha, Premier League chawi tur pawhin rinkai ber an ni chiang hle. Champion tura rinkai ber an nih chhan hi point 9-a City an tlansan tawh vang chauh hi a ni lova, a hma atanga an lo chet that chhoh tawh dan thlirin title hi an hnaih telh telh a ni. Engtikah emaw chuan an tumram an thleng ngei dawna, tunah rih chuan anmahni dang tur hian eng emaw tak a thlen a ngai a ni,” a ti.