A dik alawm, table kan en chuan Premier League hmahruaitu chu Leicester City an ni. Season chawhma lama sang taka an invawrh chhoh tirh kha chuan tuman an champion theih kan ring lo a nih kha.
Season chawhma kha chuan kan ringlo tlang a lawm
"Season chawhma chiah a la ni a, Krismas leh kumthar vuakvet Premier League fixtures hautak an paltlang hnu season chawhnu lamah enge an an dawn kan hre lo, chuvang chuan tun dinhmunah chuan rawn che tha viau mahse an champion theih hi ka ring lo," kan ti tlang kha a ni a.
Mahse hei Krismas leh kumthar fixtures tawt tak kan pel tawh, January thla pawh a ral tawh bawk, February thla kan chuangkai mek. Premier League hmahruaitu chu Leicester City an ni vang mai. Tunah chuan phat rual a ni lo, champion thei zingah an awm chiang e.
Premier League title contenders 4 an awm !
Thawhleh zan khan Leicester City chuan si hnih faiin Liverpool an hneh a, Vardy chuan goal hnih khungin, a goal hmasa zawk phei chu ropui tak a ni ringawt. Riyad Mahrez chuan anmahni half lam atangin ball kang tha takin a vawrh a, Vardy chuan umlutin, ball sawt chu a vawi hnih sawh leh hmain box pawn atangin a volley ! Liverpool goalkeeper Mignolet chuan a phak lo chiang kher mai, goal ropui tak a ni.
Inhliam vanga a chawlh renrawn hnuah Vardy a lo kir leh ta a, a hun takah a rawn kir leh kan ti thei awm e. Khelh 24 atangin 50 points an nei ta a, an hnuai chiahah Manchester City awmin, 47 points an nei. Arsenal erawh Southampton nen goal awm lova an inhnehtawk avangin 45 points an nei a, Norwich sawptu Tottenham nen points-ah innihrual mahse Tottenham chu goal difference-ah an chungnun zawk avangin table-ah pathumna an ni ta a ni.
Si thum faia Stoke hnehtu Manchester United chu pangana an ni mek a, United hian hmahruaitu Leicester City hi point 10 laiin an thlau mek. Tin, United hian palina Arsenal chu point 5 laiin an thlau a. Champion tura inum zingah Man Utd hi kan thauhthla ringawt thei bik lo, chutih laiin February thlaa hmahruaitu point 10 laia an thlauh takah chuan champion theihna chance a vang ta hle dawn niin a lang. Chuvang chuan top 4-te hi Premier League title contenders an ni tih official takin kan puang thei tawh awm e.
Champion thei kan ni - Drinkwater
Danny Drinkwater chuan,"Hetiang renga kan khel chho a nih chuan eng vangin nge title kan beisei loh bik ang ? History ngaihnawm tak a ni ngei ang le," tiin bbc a hrilh. Ranieri chuan an chungah pressure sang tak a awm hlauvin relegate an tum loh thu a la sawi fan a. Mahse tu pawhin Leicester City chu Premier League title la thei dinhmunah an ding tih kan chiang tlang a ni.
Team dang an buai em ni ?
Arsenal kha an fawr em em a, team balance pawh an nei tha kan tih thin kha a ni a. Mahse hei point 12 hlawhchhuah theihna atangin point 3 chiah an hlawhchhuak ta. Tun hnai game thumah goal an khung hleithei lo. League hmahruaitu nihna dinhmun atangin 4-naah an tlathla ta chu a ni a. Arsenal hian an ze ngai an chhuah chho leh dawn tihna a ni thei angem ? Nge khelh chhiat lai a awm ang bawkin an khelh that hun a rawn inherchhuak leh vat dawn zawk ?
Season thara Manchester City boss tur puan chian a ni tawh a, season tawpah Pellegrini chuan a champion pui emaw pui lo emaw, City a chhuahsan hrim hrim a ngai tawh dawn. Man City leh Guardiola inremna avang hian City chhungkua a buai angem ? Tih chu khawvel ngaihchan mek a ni e.
A chhan chu City key player Yaya Toure chuan Guardiola an boss a nih dawn ai chuan Etihad Stadium chhuahsan mai a duh thu a sawi tawh a nih kha. Season chawhnu lamah hian Guardiola-a chungchang avang hian City hian hniam lam an pan thei chiang a ni.
Arsenal leh Manchester City hi football fans-te chuan Premier League champion turin an la ring deuh ber thova, Tottenham an rawn form chho em em a, mahse anni chungah pawh hian rinna football fans ten an nghat ngam chiah lo chu a nih hi.
Leicester City dinhmun a tha
Europe-ah match an nei lo. Chu ringawt pawh chu hahdamna tham a ni chiang mai. FA Cup leh League Cup khelh tur an nei tawh lo bawk. Man City leh Arsenal-te'n Champions League leh Cup match khelh tur an nei a, chutih laiin Leicester City rawh chu hahdam takin Premier League-ah chiah an insawrbing thei dawn.
Game khelh tam hi season tirah chuan a pawina lang vak lo mahse season chawhnu lamah erawh a pawi thin. Inhliam leh player chauh avangin season chawhma game an phak tawh lo thin. Chutih laiin Leicester City erawh harhvang takin season tluan an hmang thei dawn niin a lang, chu chu an chance neih that em em a ni tlat a ni.
Premier League game hnuhnung 6-a an chet dan
February & March Fixtures
Leicester City
Manchester City vs Leicester City (EPL)
Arsenal vs Leicester City (EPL)
Leicester City vs Norwich (EPL)
Leicester City vs West Brom (EPL)
Watford vs Leicester City (EPL
Leicester City vs Newcastle United (EPL)
Crystal Palce vs Leicester City (EPL)
Manchester City
Manchester City vs Leicester (EPL)
Manchester City vs Tottenham (EPL)
Chelsea vs Manchester City (FA Cup)
Dynamo Kyiv vs Manchester City (UCL)
Newcastle United vs Manchester City (EPL)
Liverpool vs Manchester City (League Cup)
Liverpool vs Manchester City (EPL)
Manchester City vs Aston Villa (EPL)
Norwich vs Manchester City (EPL)
Manchester City vs Dynamo Kyiv (UCL)
Manchester City vs Manchester United (EPL)
Tottenham
Tottenham vs Watford (EPL)
Manchester City vs Tottenham
Fiorentina vs Tottenham (Europa)
Tottenham vs Crystal Palace (FA Cup)
Tottenham vs Fiorentina (Europa)
Tottenham vs Swansea (EPL)
West Ham vs Tottenham (EPL)
Tottenham vs Arsenal (EPL)
Aston Villa vs Tottenham (EPL)
Tottenham vs Bournemouth (EPL)
Arsenal
Bournemouth vs Arsenal (EPL)
Arsenal vs Leicester (EPL)
Arsenal vs Hull (FA Cup)
Arsenal vs Barcelona (UCL)
Manchester United vs Arsenal (EPL)
Arsenal vs Swansea (EPL)
Tottenham vs Arsenal (EPL)
Arsenal vs West Bromwich Albion (EPL)
Barcelona vs Arsenal (UCL)
Everton vs Arsenal (EPL)