10 Feb 2019 11:06

Inkhel

Mizo Sports Website hmasa ber

​Champion laiin Chelsea an sawp

Etihad Stadium-ah Manchester City chuan Chelsea an mikhual a, mual neitu hian 6-0 laiin mikhualte hi an sawp. Chelsea chuan kum 1991 hnuah a vawi khat nan League-ah an chak lohna nasa ber an tawng leh a. Tun hnai Premier League match 4-ah Chelsea hi vawi 3 an tlawm bawk.

Liverpool aia game khata khel tam zawk Manchester City chuan Premier League hma an hruai leh ta a, Chelsea erawh Manchester United an phak lo mai ni lovin a hmaa parukna Arsenal chu goal for-ah an phak ta lo bawk a, top 4 atanga paih chhuah league-ah niin 6-na an ni ta a ni.

Aguero chuan Manchester City tan hattric vawi 15 a siam tling ta a, Premier League-ah hattrick vawi 11 siamin; hattrick siam hnem ber Alan Shearer-a record a nihrual ta chiah. Tin, Premier League-ah goal 160 a khung tling chiah bawk a, Eric Book leh Tommy Johnson te record a thaichhe ta bawk a ni.

Manchester City 6-0 Chelsea

(Sterling 4',60', Aguero 13', 19', 56'pen, Gundogan 25')

PLAYER RATINGS

MAN CITY: Ederson 7, Walker 7, Stones 7, Laporte 7, Zinchenko 8, Gundogan 8, Fernandinho 8, Bernardo Silva 8, Sterling 9, De Bruyne 8, Aguero 9. Subs: Jesus 6, Mahrez 6, David Silva 6.

CHELSEA: Kepa 5, Alonso 5, Luiz 5, Rudiger 5, Azpilicueta 5, Jorginho 5, Kante 6, Barkley 5, Pedro 6, Hazard 6, Higuain 5. Subs: Kovacic 6, Loftus-Cheek 6, Emerson 5.

Minute 25 chhung lekin Manchester City chuan goal 4 ngawt an khung, tan atangin City lamin na takin an nawr a, goal hmasa ber hi tan atanga minute 4-na leka Sterling-a khung a ni a, De Bruyne chuan free kick atangin fing takin Bernardo Silva tan ball a pe, mual dinglam sir atanga Bernardo Silva cross chu Chelsea tlarhnung ten an clear thei lo, Sterling chuan chiang set sawtin box chhung atangin a pet goal.

Aguero chuan chance tha zet a thelh, box veilam sir atanga Bernardo Silva cross chu far post-a free taka lo awm Aguero chuan a pet goal ngei dawn nia a lan laiin a pet goal lo hlauh, hemi hnu chiah 13 mins-ah Aguero chuan a tihsual thaibo nan box pawn atangin mawi lutukin a pet goal, Chelsea goalkeeper Kepa Arrizabalaga chu theih tawpin fan mahse a kut hmawrin a khawih zauh chauh a, top corner-ah mawi lutukin a thlawk lut ta a ni.

Manchester City-in an nawr chhunzawm zel, 19 mins-ah Barkley ball tauh sual chu Aguero chuan 6 yard box pawn chiah atangin harsa lo takin a pet goal. He goal a luh atanga minute 6-naah Antonio Rudiger-a ball clear chu box pawn chiahah Ilkay Gundogan chuan changin bottom corner-ah cool takin a pet goal leh a, 25 mins chhung lekin City chuan 4-0 in hma an hruai der mai.

Darkar chanve an khelh tlin hnu atangin Chelsea game a rawn dik chho tan, Higuain-a ball pek tha zet chu Pedro chuan goal-ah a pet, City goalkeeper Ederson chuan a lo dang a, first half tawp dawn lamah box pawn atangin Higuain chuan tha zetin a volley-a, City goalkeeper Ederson chuan a lo beng per hman hlauh bawk.

Second half tan a ni, City chuan bul an tan tha leh zawk. De Bruyne-a'n mual veilam sir atanga ball tha tak a vawrh chu Aguero chuan a tauh, Chelsea goal bar a per. Hemi hnu deuh chiah hian City chuan Sterling hmangin penalty an hlawhchhuak. Veilam atangin Sterling chuan chak takin box chhungah ball a la lut, Cesar Azpilicueta chuan a titlu a, referee chuan penalty a ham, he penalty hi Aguero chuan cool takin goal-ah a chantir a, hattrick a siam ta.

Chelsea chuan an nawr hleithei tawh lo, an rilru a hnual tawh tih a chiang. Hetih lai hian Manchester City erawh an game a tha chho tulh tulh a, minute 16 a la awmin bench atanga lut Jesus chuan goal a khung teuh hle. Sterling chuan ball tha tak a pe, Jesus chuan box veilam sirah lalutin a shot, hei hi Chelsea goalkeeper Kepa chuan a lo dan sak a.

80 mins-ah City chuan goal 6-na an khung leh ta nge nge. Mual veilam sir atanga Olexandr Zinchenko cross tha zet chu awlsam takin Sterling chuan box chhung atangin a pet goal. Goal dang a luh belh tawh lo, hun a tawp a, hattrick siamtu Aguero chu man of the match atana thlan a ni ta bawk a ni.