10 Feb 2019 01:48

inkhel

Champion laiin Chelsea an mikhual dawn

Sunday zan Premier League inkhelah Manchester City chuan tun season-a anmahni tlawm hmasa ber tu Chelsea chu Etihad Stadium-ah an lo mikhual dawna, dar 9:30-ah an inkhel ang.

Khelh 26 ve veah Manchester City hian hmahruaitu Liverpool chu point thuma pha lovin pahnihnaah an awm meka, Chelsea laka an chak chuan khelh khata khel tam zawkin hmahruaitu an ni dawn. Chelsea hi tunah panganaah an awm a, an chung chiaha awm Manchester United aia khelh khata an khelh tlem avangin City lakah hnehna an chan emaw an inhnehtawkpui chuan Chelsea hi palinaah an chho leh ang.

Team hnih manager-te hi an inngeih angreng hle a, City manager Pep Guardiola chuan Chelsea chu champion thei an la nih thu a sawi bakah Chelsea manager Maurizio Sarri-a kalhmang a fak bawk. Sarri pawh hian City fakin, Premier League mai nilo, Europe-a team tha ber an nih thu a sawi ve bawk.

Season hmasa khan Etihad-ah City hian Chelsea hi si khat faiin an hneha, Chelsea hian tun season chawhma lam khan City hi Stamford Bridge-ah an hneh ve tawh thung. Tunah Etihad-ah an inhmachhawn leh dawn a, chak zawk tur sawi thiam a har hle. He inkhel hi Premier League referee tawnhriat ngah Mike Dean chuan a vil dawn a ni.

City tan hian second goalkeeper Claudio Bravo, captain Vincent Kompany leh left back Benjamin Mendy-te chu inhliam avanga inkhel thei lo tura ngaih an ni. Mendy hi a khup zai a nih avangin a la chawl meka, Kompany hi tha lam na avangin a khel thei dawn lo bawk. Bravo an la inhliam rei hmela, bench-ah goalkeeper palian Muric chu awm tura ngaih a ni.

Chelsea inhliam an nei lem lo na in, khel thei tura chiang lo erawh an nei a, Gary Cahill, bakah Callum Hudson-Odoi leh Antonio Rudiger-te chu chhawr theih an ni dawn em a la hriat loh. Cahill hi hnung na avangin a khel thei lo maitheia, Rudiger erawh Huddersfield lakah bench-a dah ni mahse City hmachhawn tura a lo kir beisei a ni a, Andreas Christensen chu bench lamah a kir leh rin a ni. Rawlthar Hudson-Odoi hi damlohna a neih avangin bench-ah pawh a awm a rinawm loh.

City hian Premier League-a Chelsea an tum hnuhnung pangaah vawithum an tlawm tawh a, game khatah goal khat aia tam an thum ngai lo bawk. Chelsea hian Premier League inkhel bika City an luhkhung hnuhnung pakuaah vawi hnih chiah hnehna an chang thei. City boss Guardiola hian a manager career-ah Chelsea hi league inkhelah vawithum a hneh lo tawha, manager a nih hnua league game-a team a hneh loh ngun ber an ni. City striker Sergio Aguero chuan Premier League-a Chelsea a hmachhawn hnuhnung pangaah goal nga a khung thei a ni.

Predicted Line-up:

Man City- Ederson, Walker, Stones,Otamendi, Laporte, Fernandinho, De Bruyne, D.Silva, Sterling, B. Silva, Aguero.

Chelsea – Arrizabalaga, Azpilicueta, Luiz, Rudiger, Alonso, Jorginho, Kante, Kovacic, Willian, Hazard, Higuain,