21 Jan 2019 11:26

inkhel

​Champion lai ka ni, Mayweather hian a duh chuan min rawn cho rawh se – Pacman

Kum 40 mi Philippine boxer Manny Pacquiao chuan tun Sunday khan a WBA Welterweight title humhimin Adrien Broner chu unanimous decision-in a hneh.

He inhnek zawhah hian Pacman chuan Floyd Mayweather chu a cho zia a lantir a, retire tawh mahse lo kir leha, ringa amah hmachhawn turin Pacquiao chuan Mayweather a sawm. Kum 2015 khan Pacquiao leh Mayweather-te hi lo inhnek tawhin, American boxer ropui Mayweather hi unanimous decision-in a chak.

Mahse an inhnek zawhin Pacquiao chuan Mayweather chu a hneh ngeia a hriat thu a lo sawi tawh a, an intum nawn leh loh chuan Mayweather-a rilru a nawm ngai dawn lo thu pawh Pacman hian a lo sawi tawh thin.

Pacquiao chuan Broner a hneh zawhin Mayweather nen a inhnek nawn leh chungchang a sawi a, “Mayweather hi ring-ah hian rawn kir leh se a duh phawt chuan kan in hnek nawn leh ang. Retire tawh mahse a duh chuan a lo kir thu puang se, min rawn cho rawh se.

“Champion lai ka ni a, a duh phawt chuan ring-ah hian lo kir se, min cho rawh se. Min cho leh tu tur hi ka nghak mek a, ka belt min rawn chuhpui duh an awm hun ka nghak reng a ni,” a ti.

Mayweather hian boxing khelh chawlhsan tawh mahse Conor Mcgregor tum turin a lo kir leh a, nikum kumhlui thlah zan khan exhiition match-ah Japanese kick boxer Tenshin Nasukawa a tum leh bawka, Pacquiao hnek tur pawh hian a rawn kir leh lovang tih a sawi theih loh.