Champion lai dang thei an la awm lo

05th December 2018, 01:12PM

Premier League inkhelah champion lai leh hmahruaitu ni bawk Manchester City chuan Vicarage Road-ah Watford tlawhin, khual mualah champion lai hi 2-1 in an chak.

City tan German winger Leroy Sane leh City player manto ber Riyad Mahrez-te chuan goal an khunga, hun tawp dawnah mual neitu Watford tan Abdoulaye Doucoure chuan goal khat a khung ve bawk.

City hian khelh 15 atangin point 41 an hlawhchhuak tawh a, hma hruai chhunzawm zelin, season kal mekah chak loh an la nei lova, vawi hnih an tumpuite an inhnehtawkpui tih loh chu an la chak fai vek. Watford ve thung hian khelh 15 atangin point 20 an hlawhchhuak tawha, 11-naah an awm mek thung a ni.

Watford 1-2 Manchester City

(Doucoure 85’) (Sane 40’, Mahrez 51’)

PLAYER RATINGS

Watford: Foster 9, Femenia 6, Cathcart 6, Kabasele 6, Holebas 6, Doucoure 7, Chalobah 5, Hughes 5, Pereyra 6, Success 5, Deeney 7. Subs: Deulofeu 7, Gray 6.

Manchester City: Ederson 7, Walker 6, Kompany 6, Stones 7, Delph 6, Fernandinho 7, David Silva 7, Sane 8, Bernardo Silva 7, Mahrez 8, Jesus 6. Subs: Laporte N/A, Otamendi 6, Gundogan 6.

Match Report

Inkhelah Watford goalkeeper Ben Foster a khel tha hle a, Foster vang hian first half-ah Watford hian goal khat chiah an chhuah a tih theih, Manchester United goalkeeper hlui Foster hian save pawimawh tak tak a nei nual. City keeper Ederson pawh Foster ang chuan buai lo mahse, mamawh a nihin a che tha hle a, Troy Deeney-a pet goal tur pawh tha takin a lo dang ve bawk. City hian Watford hi nawr hle mahse Watford lam an tang thei hle a, mahse first half tawp hma lawkin Sane chuan City tan goal a khung. Mahrez chuan box pawn atangin box chhungah ball a vawrh luta, Sane chuan a awmin goal-ah a lo khung zui a, City-in 40 mins-ah hma an hruai.

Second half tan atanga minute ruk a ralin, goal hmasa zawk assist tu Mahrez chuan City goal hnihna a khung ve leh a, Gabriel Jesus-a’n box chhung veilam atangin lei hrulah Mahrez ball a pe phei a, Mahrez hian a ke hman thiam lam, a ke veilam chuan mawi takin Watford goal-ah a lo chhuih lut. Season liamtaa City tana che tha Jesus chuan tun Premier League season kal mekah goal khat chiah a la khunga, season liamta a pha lo. Watford lakah pawh goal khungna chance nei thin mahse, goal hmaah a hriam tawk lo hle.

Second half-ah pawh Foster a khel tha lehpek a, save tha tak tak leh pawimawh tak tak neiin, City-in goal hnih chiah an khung chhanah Foster hian mawh a phur sang hle pawh a tih theih awm e. City hi si hnih faia an chak tawh mai dawn emaw tih hnuin 85mins-ah mual neitu lamin goal an khung ve a, box chhung dinglam atanga cross ball lokal chu Ederson chuan lo khawih buai mahse Doucoure chuan chep tak karah goal a khunga, inkhel hi 2-1 in a tawp ta a ni.

Watford vs Man City FT:

Shots: 11-15

Pass accuracy: 66%-88%

Chances created: 8-11

Possession: 30%-70%

Copyright © inkhel.com 2024. All rights reserved.