Chennaiyin FC chuan Manang Marshyangdi chu 3-2 in an hneh a, heti chung hian AFC Cup 2019 ah an zinkawng a tawp ta tho a ni.
Nilaini khan Kathmandu khawpuiah Chennaiyin FC leh Manang Marshyangdi te chu an inkhel a, Indian Super League (ISL) club hian hun tawp dawn hnaihah chakna goal an thun a, a chak zawk ni mahse an group-ah pahnihna an ni a, an tan kal zui theih a ni ta lo.
John Gregory chuan Minerva Punjab nen 1-1 a an inhnehtawk tuma a khelhtir pali chu a thlak danglam a. Hrem vanga match khat khel thei lo tura an hrem, Brazilian centre-back Eli Sabia chuan bul a tan ve leh tawh a, Zohmingliana Ralte chu a rawn thlak a ni.
Defender naupang tak Aimol Reamsochung pawhin bul a tan a, Laldinliana Renthlei chu a rawn luahlan a. Thoi Singh pawhin midfield-ah Dhanapal Ganesh chu a thlak bawk a, an match hnuhnung bera goal thuntu Mohammed Rafi chuan CK Vineeth chu a sir lamah a thlak bawk.
Indian Super League champion lo ni tawh chuan an kal zel theihna atan chak ngei a pawimah tih an hria a, a tir atangin tan an la nghal hle a. Marina Machans hian goal thun hmasatu nih an tum viau a, Kathmandu khawpuia an inkhelhnaa phul lem an phah chu an duh angin an hmang thiam lo a, hei vang hian ball chu an duh ang takin an khawih theih loh phah a ni.
First half chhung hian an innawr tawk hle a, team chungnung zawk sawi thiam harsa khawpin an inhnehtawk a tih theih a. Team pahnihte hian goal thun theihna hun tha pawh an insiam nual ve ve a, half time thlengin goal erawh an thun thei ta lo ve ve thung.
Second half an khel leh deuh chauh a, rei pawh an khelh hmain he inkhela goal hmasa ber chu a lut a. Minute 53-ah Anirudh Thapa chuan goal lamah ball a pet phei a, hei hi Mohammed Rafi chuan a lo tauh lut a, Chennaiyin FC chu hma a hruaipui a ni.
Goal hmahruai luh atanga rei lutuk loah goal dang a luh belh leh a. Minute 66-ah Mohammed Rafi chuan Manang Marshyangdi box chhunga awm Eli Sabia chu ball a pe a, Brazilian player Eli hian goal-ah chuan lo thunin 2-0 in hma an hruai zui a ni.
An khelh chhunzawm zel a, Chennaiyin chu an dinhmun a duhawm chho hle a. A thlengtu team te hian minute 71-ah goal an thun ve a, Hemang Gurung ball pek chu lain Afeez Olawale chuan mawi zetin an si phurh pakhat sut nan a hmang a ni.
He goal luh atanga rei vak lo, minute 79-h Afeez Olawale bawk chuan goal dang a thun belh leh a, chungnung zawk an awm loh phah a. Chennaiyin FC chuan knockout stage thleng thei tur chuan an chak ngei ngei a ngai tih hriain goal thun belh an tum hle.
Hun tawp hma hret, minute 88-ah Malayali striker Mohammed Rafi chuan goal a thun leh hlauh mai a, hun tawpah Chennaiyin FC chu 3-2 in an chak a. Guwahati lama inkhelah Abahani Dhaka chuan Minerva Punjab an hneh avangin Abahani Dhaka hi Group E ah hmahruaitu an ni a, Chennaiyin chu pahnihna an ni ta a ni.
Bangladesh club Abahani Dhaka chu an group atang hian knockout stage-ah an inhlang chho a, pahnihnaa awm Chennaiyin FC chu an tla ve ta a ni.