Merseyside derby-a Liverpool an hneh loh danah Everton manager Marco Silva chuan chak loh an phu lo tih a sawi.

Silva chuan Sky Sports a hrilh danin, “A hmasa bera ka sawi duh chu, chak loh kha kan phu hlawl lo tih hi a ni. Ka naute ka chhuang em em a, football-ah chuan result pawimawh ber mahse inkhel bul kan tan ho veka, a tawp pawh kan khar ho vek . Kan supporter-te pawhin chutiang rilru chu an put ve ngei ka beisei a, ka naute an thawkrim a, an thawhrim zia chu khelhmual chhungah an ti lang,” a ti.

Silva chuan sawi belh zelin, “Inkhelh hmain Liverpool lakah kan beih nasat tur thu ka lo sawi tawh a, game a tang em em a, keini aiin bul tan tha zawk mahse kan duai bik lo tih a lang. Second half-ah first half aiin inkhel kan thunun a, chak loh hi kan phu lova, inhnehtawk tur kan ni. Liverpool an vannei em em a, a chhan chu chak an phu bik lo a ni,” a ti bawk.

Liverpool manager Jurgen Klopp chu goal luh avanga a lawm lutuk chu khelmual chhungah a tlan lut a, Reds goalkeeper Alisson Becker nen an inkuah. Klopp chuan a ‘celebrate’ dan chungchangah Marco Silva lakah thupha chawi mahse Silva chuan Klopp-a ‘celebrate ‘ dan chu a hmuh loh hrim hrim thu a sawi.

Silva chuan, “Klopp kha khelhmual chhunga a tlan lut ka hmu lo hrim hrima, hmu pawh ni ila min zahloh vanga tlan lutah ka ngai chuang lovang,” a ti.