"Engtiang chiaha thiam nge in nih kan hre lo. Mahse kan Bundesliga club lian Hoffenheim khan in lamah goal thum chiah an khung thei tih kan hriat atang khan thapui chhuah tak meuhva beih che u kan tum a ni. Chak loh kan tum lo hrim hrim a ni," tiin German Students National Football team head coach Marcus Jung chuan Mizoram chanchinbumite a hrilh.
Vawiin khan Hotel Regency-ah German Students National Football Team hotute chuan press conference an nei a. He hun hi MFA Honorary Secretary Pu Lalnghinglova Hmar chuan a kaihruai a, German Students National Football Team Head of Delegation Lutz Hermann Hangartner, Head coach Marcus Jung, Steffen Wolhfarth leh Technical Advisor Arunava Chaudhuri-te press conference-ah hian an inlan a ni.
Team Head of Delegation Lutz chuan player an khawm dan tlangpui a sawi a,"Kan player-te hian football khelh nuam an ti hle a, hetih lai hian Football hi eizawnna tak tak atana hmang chu kawng dangah an kal a ni. Tuna rawn kalte hi University zirlai inkhel thiam tak tak an ni a. Anni hian Football hi eizawn nan an hmang ve lova, inhliam avangtein an career a chhe thei tih an hriat avangin lehkha zir lamah theih tawpin an kal ta hlawm zawk a ni.
"Zirna lama an kal avang hian player chhia an ni hlawm lo. Under 15, 18 leh 20-ahte ram aiawha chhuak zak zak tawh an ni a. Chung player-te chu sawm dawn kan rawn hruai nghe nghe a ni." tiin.
An khelh tum dan chanchinbumite zawhna chu head coach Marcus chuan,"Tuna sawi chi a ni lo, a chhan chu chak kan tum a. Engpawh huamin kan khel dawn, chutih laiin competition tak tak a nih loh avangin hlim taka khelh erawh kan tum tho.
"Hoffenheim nena in match kha uluk takin kan lo en a, pumruaah chuan min khan dawn lo tih kan hria, mahse inrang a, tactic-ah in sang em em a, in game speed a sang em em bawk. Nawr vak che u kan tum rualin harsatna lian kan tawk thei tih kan inhriat avangin kan fimkhur hle dawn bawk a ni," tiin a sawi. Forward Steffen Wolhfarth pawhin goal khung ngei a tum thu leh an ram jersey chu chak loh pui an tum loh thu a sawi bawk a ni.
World Champion ni lai an ni a, tun anga Football-a hlawhting ram an nih theih dan zawhna chu Lutz Hermann chuan,"2000 kum khan kan hlawhchham chiang hle mai. DFB chuan theih tawpin hma a la ta a, Top league club leh 2nd division club-te chuan Youth Academy tha tak neih tur kan ti bawk a, theih tawpa naupang kan enkawlna rah chu tunah hian kan seng mek a ni.
"Sports leh zirna hi a kalkawp reng a, Science thiamna thlengin kan chawhpawlh a, kum tin DFB hian Science Congress a huaihawt thin a, hei hian nasa takin hma min ti sawn bawk a ni," tiin a sawi.
Hoffenheim leh Mizoram XI match kha uluk takin an lo en a, Mizoram chu nawm hmel an ti hle nghe nghe. Tin, Hoffenheim player-te pawhin Mizoram nuam an tih thu an sawi sek bawk nen, chuvang chuan Mizoram tlawh ngei ngei an rawn tum tlat thu German Students National Football Team-te hian an sawi bawk a ni.