Thawhlehni zan khan Portugal chuan friendly match-ah si hnih faiin Slovenia an hneh lo, he match-ah hian Cristiano Ronaldo a khel ve a, a thinur hle nghe nghe.

Adam Cerin leh Timi Elsnik ten Slovenia tan goal an khung a, Roberto Martinez-a hnuaia Portugal an chak loh hmasak ber a ni nghe nghe.

Sweden an hmachhawn tum khan Ronaldo chu Portugal team-ah a tel lo, 5-2 laiin an chak a nih kha.

Martinez chuan a player thenkhat te a chawlh hahdamtir a, kum 39 mi Ronaldo chu Slovenia an hmachhawn tumin a chhawr thung.

Si hnih faia an chak loh avangin Ronaldo a thinrim hle a, inkhelh zawhah lungawi lo tak chungin tunnel a pan nghal bawk.

Kar hmasa khan Portugal defender Joao Cancelo chuan Ronaldo-a an innghah pumphlum tawh loh thu a lo sawi tawh a nih kha.

"Player pawimawh ber a ni thin, kum 15 chhung zet chu Messi nen an inel. Hetih lai hian football player te that ber hunlai chu kum 25 atanga kum 32 a ni.

"Ronaldo hi player pawimawh tak a ni a, hetih lai hian amahah hian kan ram team hi kan innghat em em tawh lo a ni," tiin Cancelo chuan RTP radio a hrilh.

Kumin Euro hi Ronaldo tan chuan ram tana tournament lian a khelh hnuhnung ber tur a ni tawh dawn. Kum 2016 khan a captain-na hnuaiah Euro an chawi. Hetih lai hian football pundit Frank Leboeuf pawhin Ronaldo a khelh loh chuan Portugal an champion a rin thu a sawi chhuak ve bawk.