21 May 2020 05:00

inkhel

Chak hi Real Madrid thisenah a luang tel tawh: Zidane

Real Madrid manager Zinedine Zidane chuan chak chu Los Blancos thisenah a luang tel tawh niin a sawi.

Zinedine Zidane chuan coronavirus vanga inkhelh tihtawp lailawk a nih hnua an inkhelh leh theih hunah chuan tha taka chet zui theih an tum thu sawiin, season kal mek chu tha taka hman zawh an tum thu a sawi a ni.

Zidane chuan, “Tun kar chu kar duhawm tak a tih theih a, training kan nei leh thei tan tawh a, hna kan thawk leh thei ta hi hmasawnna ropui tak a ni. Kan team chuan tun kar chhung ringawt pawhin hma kan sawn tih a chiang a, kar leh lamah phei chuan kan that belh viau ang,” a ti.

“Training neih theih hi a thain a hlu a, chutih rualin inkhelh theih tluka duhthusam a awm lo a. Kan player te hian inkhelh leh theih vat hi an beisei hle,” a ti bawk.

A sawi zelnaah, “Thil hi a eng zawngin kan thlir a, kan hna ngai hi kan thawk chho leh thei dawn hnai tawhin kan ring a. Khelmualah hun kan hmang chho leh thei dawn tawh niin a ngaih theih a, hei hi lawmawm kan ti hle a ni,” a ti.

“Player te pawhin tuna training neih leh theih a nih takah hian tangkai taka hetiang hun hi hman hram hram an tum a. Tun season kal mekah match 11 khelh tur kan la nei a, kan hmabakah hian tha taka che thei turin theihtawp chhuah kan tum a. Chak zel kan duh a, chak hi Real Madrid DNA ah hian a tel tawh a ni,” tiin a sawi bawk.

March thla atang khan La Liga chu coronavirus darh mek vangin an titawp lailawk a. Tun kar Thawhtanni atang khan club hrang hrangte chu training neih an phalsak leh tan a, chutih rualin player 10 aia tam erawh awm khawm an phal lo thung a ni.

A hmain player te chu May 4 atang khan mahni awmna theuhah training nei tura tih an ni a, tuna player 10 chinin training neih theih a nih leh takah chuan La Liga season chhunzawm theihna turah beiseina sang tak an nei chho leh mek a ni.

Real Madrid player te chu hriselna veng fimkhur tak chungin May 11 atang khan training nei tura koh tan an ni a. Fimkhur takin hma an la a, hri leng mek kai lo turin hma an la chho ve mek bawk a ni.