15 Mar 2019 05:10

inkhel

Chak ber ni tur chuan mahni hmasial a ngai: Bottas

Valtteri Bottas chuan Formula One intlansiakah chak tur chuan mahni hmasial a pawimawh tih a sawi.

Formula One 2019 season chu tun karah an tan tawh dawn a, Australian Grand Prix en tur a awm dawn a. Mercedes driver pakhat zawk Valtteri Bottas chuan world championship title lak theih ngei a duh tawh thu sawiin, chutiang ti thei tur chuan mahni tana thahnemngaih a pawimawh tih a sawi a ni.

Kum 29-a upa Valtteri Bottas hi world champion Lewis Hamilton nen an inkawp leh dawn a, anni pahnih hi kum thum an inkawpna tur a ni tawh a. A hma zawngin Bottas hi Hamilton-a thachhangdawltu angin a awm char char a, hetianga awm zui zel hi a duh tawh loh thu a sawi a, chak ber nih ve a duh tawh thu a sawi chhuak.

Bottas hi 2018 ah khan che tha thawkhat viau mahse chetsual a nei leh thin a, hei vang hian chak ber nihna a nei ta miah lo a, chutih laiin a teammate Hamilton chu vawi 11 ngawt chak ber a ni thei thung a. Kum tawp lamah Bottas chu Russian Grand Prix-ah pakhatna ni thei tura ngaih a ni a, mahse Hamilton leh Sebastian Vettel te chu title inchuhtu ber an nih chhoh avangin Mercedes chuan Bottas hnenah Hamilton chu chaktir turin an ti a, Finnish driver hi pakhatna a nih loh phah a ni.

Tunah chuan season bul an tan leh dawn chauh bawk a, team lampang pawhin an driver pahnih te chu rualkhai taka an enkawl a beisei thu Bottas chuan a sawi a. Tih bik nei loa an hotute’n an enkawl chuan title la thei dinhmuna a din thu a sawi tel a, 2018 season theihnghilh a duh thu sawiin, kuminah tha thara bul tan a duh thu a sawi a ni.

Valtteri Bottas chuan, “He infiamnaah hian chak ber ni thei tur chuan mahni hmasial a ngai khawp mai a, team tanrualna pawimawh viau mahse mahni indah pawimawh hmasak a tul thin a. Kum kan hman liam tawh ho atangin hei hi chu ka hre chiang ve ta hle a, a bikin nikumah khan hetiang boruak hi ka hre chiang lehzual a ni,” a ti.

“He infiamna bak hi eizawnna dang ka nei lo a, season tawpah inchhirna neih loh dan ngaihtuah a ngai a. A tir atangin tha taka chet ka duh a, bung thar kai thei turin theihtawp ka chhuah dawn a. Engkim thleng thei vek a ni a, chiang sa engmah a awm bik lo a ni,” tiin a sawi bawk