​CEM Football Tournament-ah Vengpui-II an champion

24th March 2019, 11:03PM

Lawngtlaia District Football Association huam chhunga Football inelna lian ber CEM Football Tournament chu March ni 23, 2018 (Inrinni) khan zawh fel a ni a, Final ah hian Vengpui-II FC ten Council Veng FC te chu 2-0 in an hneh a, Champion Nomawi an chawi ta ni.

Tun season a Inter Club Football tournament hnuhnungber CEM Trophy-ah hian Club 17 chhuakin goal 86 a lut a. Yellow Card 69 leh Red Card 6 phawrh a ni a. Red Card pakhat hi Vengpui-II FC Physio Benny-a pek niin hnawhchhuah a ni.

Final-ah hian mipui tawiawmpui club pahnihte hian an nei tha hle. Inkhel tan phat atangin Club pahnih te hi an innawr nghal a. Minute 20 chhung chu Council Veng FC te hi an chungnung zawk kan ti thei awm e, Vengpui-II FC te hian an game khelh dan an rawn siam tha chho a. An striker Lalrinsanga chuan chance nei zauh zauh mahse a duh angin a che hleithei lo.

Midfield-ah Vengpui-II lam an chungnung zawk tih a hriat, an striker-te ball um luh tur an pe tam hle a. Mahse, Council Veng defender-te erawh an su tlang thei bik lo. Council Veng lamin an nawr let leh a, Counter attack hlauhawm tak an nei, Vengpui-II FC-in defender lam atangin ball an rawn vawrchhuak a, defender lam an chebuai zauh zauh.

Lalrinsanga’n ding lamah nalh zet maiin Zautea um luh turin a pe a, Council Veng defender ten Offside trap an siam chu Asst.refree in a hmuhhmaih hlauh. Chu chu Zautea hian remchangah lain ball a tlan luhpui nghal a, defender lamin an dang hman ta lo, Keeper Malsawmsanga a rawn up a, Zautea hian fing thiam takin mawi zet maiin Goal-ah a chantir ta. Fans authawn a ring hle mai, Council Veng lamin Refree-ah complain an nei, mahse awmzia a nei lo.

Vengpui-II lam hian an nawr chhunzawm leh nghal a, goal chance hlauhawm tak nei lo mahse, Council Veng Midfield-ah an talbuai. Council Veng lam hian nawr ve thin mahse Vengpui-II in attacking game hmuhnawm tak an khel a. Minute 44-ah penalty area chhungah Council Veng lam an talbuai, chu chu nangchingin Zautea bawk chuan dinglam kil sirah mawi zet maiin a goal hnihna a khung leh ta. Half time a nih chuan si hnih faiin Vengpui-II lamin hma an hruai der mai.

Second half tan a ni a, Council Veng lam hian game an rawn thlak danglam a. Lawngtlai U-14 Captain Lalchema chu goal nawr turin Manager-in a rawn dah lut. 48mins-ah CFC midfielder Lalchhuana'n freekick a pet a, hei hi CFC forward Eddy-a'n goal sirah a pet hlauh mai. Council Veng lam hian an nawr chhunzawm zel a, goal hlauhawm sawi tur erawh an nei tam lo.

Minute 68-ah Council Veng lamin Freekick an hlawhchhuak a, Lalchhuana’n penalty area-ah a vawrh lut, tun tournament-a Council Veng tana goal khung thei tak Elvis-a’n uihawm takin a heah out tlat mai. Council Veng lam hian goal khung tumin an nawr viau a, mahse defender-te paltlang thei tur khawp striker tha an neih loh an tuar.

Council Vengin an forward tha, kum la naupang bawk si Anthony-a an rawn dah lut a. Mahse, ani pawh hian awmzia a rawn nei thei tak tak lo. Vengpui-II lam hi a tawm zawkah tang mahse, counter attack a an nei na hle a. Minute 70-ah Lalrinsanga’n chance tha tak a nei a, fans te tan lawmna tur engmah a siam sak thei ta lo.

Hun tawp dawnah Council Veng lam hian chance tha tak mai an nei, an defender Vanhnuailiana’n chance tha a hmuh chu goal bar chungah na zet maiin a pet a, fans te pawi ti thawm bak hriat tur a awm lo. Second half-ah goal luh belh a awm tawh lova, Vengpui-II FC chuan 2-0 in hnehna an chang a, CEM Tournament Champion an ni ta a ni.

Champion Team hian Trophy, Certificate leh Rs 50,000 an dawng a. Runners Up hian Certificate leh Rs 30,000 an dawng bawk a ni. Fair play Award la tu Council Veng FC te hian Rs 5,000 an dawng bawk.

Mimal lawmman dawng te - Best Keeper : H. Lalpekhlua (VENGPUI II FC), Top Scorer : Lalrinsanga - 5 Goals (VENGPUI II FC), Best Player : MC Lalthanzauva (VENGPUI II FC te an ni a. Fair Play Award hi Council Veng FC ten an dawng bawk a ni.

Copyright © inkhel.com 2024. All rights reserved.