Boston Celtics chuan Toronto Raptors an hneh a, NBA champion hi playoff khelh mekah an dinhmun a tha lo hle.
Celtics coach Brad Stevens chuan an inkhelh hma hian a team te chu thil tam tak a hrilh hran lo, defense lamah a tir atanga thahnem ngai lehzual turin a fuih a, hetiang tak hian an khel a, an che fuh ta a ni ber mai.
Jaylen Brown chuan point 27 a score a, Celtics chu a hniam zawk an ni lo tluanchhuak a, a tawpah champion lai Toronto Raptors chu 111-89 in an hneh thei a. Eastern Conference semi final series Game 5 a an chak hian Boston chuan 3-2 in hma an hruai ta a ni.
Kemba Walker chuan Celtics tan point 21 a thun a, Jayson Tatum chuan point 18 a thun a, Daniel Theis leh Brad Wanamaker te chuan point 15 ve ve an thun bakah Marcus Smart pawhin point 12 a thun ve bawk a ni.
Fre VanVleet chuan Toronto tan point 18 a thun a, Norman Powell chuan point 16 a thun a, Pascal Siakam leh Kyle Lowry te chuan point 10 ve ve an thun bawk a. Matt Thomas pawhin Toronto tan hian point 10 chu a thun ve a ni.
Western Conference semi final series Game 3 ah Los Angeles Clippers leh Denver Nuggets an inkhel a, he inkhelah hian Clippers chu 113-107 in an chak a. Best-of-seven series-ah hian Clippers chuan 2-1 in hma an hruai chiah a ni.
Paul George chuan point 32 a thun a, Kawhi Leonard chuan point 23 a thun bawk a. Leonard hian rebound 14 a lak bakah assist 6 a nei a, block 2 a nei tel bawk a ni.
Nikola Jokic chuan Denver tan point 32 a thun a, rebound 12 a lak bakah assist 8 a nei bawk a ni.