17 Nov 2018 01:52

inkhel

Celtics in Raptors an hneh

Kyrie Irving chuan point 43 a thun bakah assist 11 a nei bawk a, Eastern Conference hmahruaitu Raptors chu Celtics in an hneh thei a ni.

NBA player tha berte zinga mi pahnih chu Boston Celtics leh Toronto Raptors te inkhelh tumin an inep a, Kyrie Irving leh Kawhi Leonard te telna inkhelah hian Celtics chuan 123-116 in Raptors chu overtime khelh hnuah an hneh.

Team pahnihte hi an inlehthal chho zak zak a, overtime khelh a ngai hial a. Iriving chuan fourth quarter ringawtah point 19 a score a, a vaiin point 43 a score tling a, assist 11 a nei hman bawk a. Kum 26-a upa Irving hian overtime bikah point 4 a score a, assist 4 a nei zui bawk.

Jayson Tatum chuan Celtics tan point 21 a score , Gordon Hayward chuan point 15 a score bawk a. Kawhi Leonard chuan point 31 a score a, rebound 15 lain assist 4 a neih bakah steal 3 a nei bawk a ni.

Anthony Davis chuan point 43 a score a, rebound 17 a la bawk a, point 19 ngawta an hniam tawh hnuah Pelicans chu Knicks lakah 129-124 in a chakpui leh thei a. Jimmy Butler chuan point 28 a thun a, assist 7 a nei bawk a, 76ers tana a game hmasa berah Jazz chu 113-107 in an chak zui a ni.

Rookie Jaren Jackson Jr. chuan Grizzlies tana a point thun hnem ber tum a tawng a, point 27 thunin Kings chu 112-104 in an hneh.

Washington Wizards chu Brooklyn Nets lakah 104-115 in an tlawm a ni.

Result hrang hrang:

Boston Celtics 123-116 Toronto Raptors

Indiana Pacers 99-91 Miami Heat

Philadelphia 76ers 113-107 Utah Jazz

Brooklyn Nets 115-104 Washington Wizards

Memphis Grizzlies 112-104 Sacramento Kings

Minnesota Timberwolves 112-96 Portland Trail Blazers

New Orleans Pelicans 129-124 New York Knicks

Milwaukee Bucks 123-104 Chicago Bulls