Celtics in champion lai Raptors an hneh

31st August 2020, 09:08PM

Boston Celtics chuan Eastern Conference second round series Game 1 an khelhah champion lai Toronto Raptors an hneh.

Walt Disney World Resort a NBA playoff an khelhah hian Boston Celtics chu an chungnung zawk mah a, he inkhelah hian Toronto Raptors chu 112-94 in an hneh a ni.

Jayson Tatum leh Marcus Smart te chuan point 21 ve ve an thun a, Kemba Walker chuan Celtics tan point 18 a thun a, rebound vawi 10 a la bawk a. Raptors tan Kyle Lowry chu a che tha deuh ber a, Orlando, Florida ah point 17 chu a score ve a. Anni hian September 1 ah Game 2 an khel leh dawn a ni.

Los Angeles Clippers chuan Dallas Mavericks chu 111-97 in an hneh a, Western Conference semi final an lut thei a. Kawhi Leonard chuan point 33 a thun a, rebound 14 a lak bakah assist 7 leh steal 5 a nei bawk a, Clippers hi 4-2 in an chak thei a ni.

Kawhi Leonard chu post-season game bikah an team tana point 30 chuang score bakah steal 5 nei thei hmasa ber a ni a. Mavericks tan hian Luka Doncic chuan point 38 a thun a, rebound 9 a lak bakah assist 9 a nei bawk a, a pawlte erawh a chakpui thei ta lo thung.

Clippers hian semi final ah chuan Denver Nuggets leh Utah Jazz te inkhela chak zawk zawk an hmachhawn dawn a ni.

Jamal Murray a che tha hle a, Denver Nuggets a chakpui a, Game 6 ah 119-107 in Utah Jazz an hneh a, 3-3 in an la inhnehtawk theih phah a. Murray hian point 50 zet mai a score a, chak zawk an la awm loh phah a ni.

Jazz star Mitchell chuan point 44 a thun a, tun tum hi Mitchell leh Murray te’n game khatah point 30 an score tlin ve ve vawi 4-na a ni a, anni pahnih hi NBA huangah chuan 2006 a James leh Gilbert te hnua hetianga ti leh thei hmasa ber hi an ni.

Results:

Boston Celtics 112-94 Toronto Raptors

Los Angeles Clippers 111-97 Dallas Mavericks

Denver Nuggets 119-107 Utah Jazz

Heat face Bucks

Copyright © inkhel.com 2024. All rights reserved.