Celtics hmaah 76ers an tlawm

01st May 2018, 10:05PM

Terry Rozier, Jayson Tatum leh Al Horford te chuan point 83 zet mai an thawh khawm a, Boston Celtics chuan Philadelphia 76ers an hneh theih phah a. Eastern Conference semi final Game One-ah hma an hruai.

Rozier chuan poiny 29 thunin, rebound 8 leh assist 6 a nei a. Tatum pawhin point 28 a thun a, playoff bikah chuan point a la score hnem ber a ni a. Horford chuan point 26 a thun bawk a, Celtics hi 117-101 in an chak a, 1-0 in hma an hruai theih phah a.

Philadelphia tan Joel Embiid chuan point 31 a thun a, rebound 13 lain assist 5 a nei bawk a. JJ Redick chuan point 20 thunin, Ben Simmons pawhin point 18 a thun a. 76ers hi March 13 hnua an chak loh vawi hnihna a ni.

Nilaithawhtan hian Game 2 chu Boston-ah an khel leh ang.

Boston hian first round series-ah Milwaukee Bucks an hneh a, Philadelphia pawhin Miami Heat chu game 5 ah an hneh bawk a. 2011-12 East semi final hnuah season tawp hnua 76ers leh Celtics inhmachhawn leh hmasak ber a ni a. An intawn hnuhnun ber hian Boston chuan game 7 khelhah Philadelphia hi an hneh a, 76ers hian playoff second round an thlen hnuhnun ber a ni bawk.

Celtics hi season pangngaiah 76ers nen vawi li an inkhelhah vawi thum an chak zawk a, a vaia lakin Celtics hian point 23 in an thun hnem zawk a ni.

Copyright © inkhel.com 2024. All rights reserved.