Kyrie Irving chuan tun season-ah Boston Celtics chu NBA title lakpui a tum thu sawiin, season zawh huna a awm zel dan tur chu sawi theih a la nih loh thu a sawi.

Boston Celtics guard Kyrie Irving hian tunah tak chuan thil dangah a rilru a pek vak loh thu sawiin, tun season chhunga Celtics chu NBA title lakpui chiah tih tak taka ngaihtuah a neih thu a sawi.

Irving chuan, “Tun season-ah chuan ka ngaihtuah leh ka tum ber chu Boston Celtics champion pui hi a ni a, chutiang thlentir thei tur chuan theihtawp chhuah pawh ka tum bawk a. Thil dang chu hun a kal zel ang a, a rawn inching fel ve leh zel mai ang,” a ti.

“Season tan dawn khan thil tum bik kan nei nghal a, thil tihpuitlin tum chi hrang hrang kan neih zingah NBA title lak hi kan tum lian ber a ni a. Kei pawhin chu chu ka ngaihtuahna ka senna berah ka hmang zui a. Nakin zelah chuan ka tana tha tur ka ti zel ang a, chu bak chu engmah ka awm zui dan tur hi sawi theih a la ni lo,” a ti bawk.

Tun season tawp hunah Kyrie Irving hian Boston Celtics tana contract a ziah chu a hmang zo tawh dawn a, contract thar a ziak a nih loh chuan free agent a ni thei dawn a ni.

Nikum October thla khan an team thil tihnaah Irving hian Boston Celtics in cham zui zel tura an duh a nih phawt chuan chutianga awm chu a tum dan a nih thu a sawi a, fans te chu lawmin an au ring hle nghe nghe a. Zirtawpni khan a thil sawi dan a danglam ta deuh hlek a, rilru thar a pu ta nia ngaih theihin a awm a ni.

Cleveland Cavaliers chhuahsana Los Angeles Lakers lama LeBron James a kal takah chuan Eastern Conference lamah Kyrie Irving leh a pawlte Boston Celtics chu huhang nei lian ber tura ngaih an ni a. Tun dinhmunah chuan Milwaukee Bucks leh Toronto Raptors chu a chungnung berte an la ni mek a, Celtics chu palinaah an awm mek a ni.

“Tun season chu kan tum angin thil a kal fuh lo laklawh a, mahse beiseina sang tak erawh kan la nei chho zel a. Thil engmah hi sawi chian theih a la ni lo a, hma kan sawn chho ve tawh ngeiin ka ring,” tiin Kyrie Irving chuan a sawi.