Celtic chuan hun rei tak ata an lo nawr tawh ding chunga inkhel en theihna lai hmun buatsaih chu thu neitute lamin an phalsak ta nge nge a, Celtic Park-ah hian mipui 60,000 an leng a, stadium-a kil khat chu ding chunga inkhel en theih nan buatsaih a ni tawh dawn a, din theihna hmunah hian mipui 2,600 vel leng thei tura ruahman a ni.
2016-17 season atangin Celtic hian supporter 2,600 te din theihna tur hmun chu an hmang tan thei dawn a, Glasgow city Council chungah Celtic Football club hi a lawm hle a ni.
Chief executive Peter Lawwell chuan,"Rail Seating Celtic Park-a kan hmang thei tur hi inkhel entu hipna tangkai tak a ni dawn a. Khawvel pumah supporter tam takte chuan ding chunga inkhel en an thlang zawk thin. Celtic in kan ngaihpawimawh ber chu mipui himna a ni a, he thil pawh hi tha taka kalpui kan tum dawn a ni," tiin celtic official website a hrilh.
Germany leh Austria-ah chuan inkhel entute an ding hlawm a, hei hian entu an ngah phah bakah inkhel boruak a ti nuam em em. UK-ah hian ding chunga inkhel en khap a ni a, 1989 Hillsborough disaster vang khan UK-ah hian ding chunga inkhel en phal a ni tawh lo. 1990 chho khan stadium chhungah thutna dah khah vek a ni ta a.
Hetih lai hian Football fans tam tak chuan ding chunga inkhel en an la chak a, Safe Standing a awm theih dawn phawt chuan club-te pawhin ding chunga supporter ten inkhel an en theih an duhsak. Mahse thuneitute lamin mipui himna an ngaihtuah avangin phal a ni ta mai lova. Tunah erawh Celtic Park-ah chuan phalsak a ni dawn ta a, hei hian English Premier League lam pawh a kan kai zel a rinawm a, tun atanga kum 5 chhung chuan English Premier League-ah ding chunga inkhel an en ngei a rinawm chho ta a ni.