Champhai District Football Association (CDFA) hnuaia Zone Champion-te inelna R Lalngaihsang Memorial Inter Zone Football Tournament 2023, Melbuk khelmuala neih mek chu March ni 18, 2023 khan Semifinal khelh zawh a ni. 

ZOKHAWTHAR 4-3 MELBUK

A thlengtu Zone hi team hnih tel phalsak țhin an ni a, Zokhawthar Zone  atanga Team tel pahnih inkhel hmuhnawm takah hian, a thlengtu Melbukin inkhelh tan atanga min 16-na lekah Zomuanpuia goal thun hmangin hma an hruai nghal. 

Minute 16-ah Lallawmtluanga'n Melbuk goal 2-na a khung zui leh a, Melbuk hian awlsam takin Zokhawthar Zone Derby-ah hian hnehna an chang mai dawn niin lang mah se, Zokhawtharin awlsam taka tlawm tum lovin an nawr let a. 

Minute 30-naah an beisei ang ngeiin Vanlalpuia hmangin an si phurh an sut a, 1st Half tawp dawn minute 45-naah Lalramhluna hmangin an si phurh an sut zo.

2nd Half-ah 1st Half inkhel bul tan tha lo zawk Zokhawtharin bul an tan tha zawk a, minutein 47-naah Lalmuanawma'n Zokhawthar hmahruaina goal a khung a.

Lalmuanawma bawk hian minute 75-naah Zokhawthar goal 4-na leh ama goal 2-na a khung. Melbukin  minute 90-naah Lalsawmzela hmangin an si phurh sut țhen mah se, hun a tawp zui a, Zokhawthar hian a thlengtu Melbuk lakah hnehna hlu tak an chang ta a ni.

HNAHLAN 1-0 KHAWBUNG

Semifinal hnuhnung zawkah Hnahlan leh Khawbung an inkhel a, inkhel boruak tang takah hian goal 1 chiah lut mah se, inkhel hmuhnawm tak a ni. 

Minute 27-ah Hnahlan tan Robert Thanghmingsanga'n goal a khung a, he goal hi Hnahlan chakna goal, final hruai thlengtu goal pawimawh tak a ni zui.

Khawbung hian an siphurh sut tumin theihtawp chhuah mah se, Hnahlan lamin an goal khung hi an humhim tluan thei a, final an inhlangkai thei ta a ni. Final hi thawhtanniah khelh a ni ang.

Reporter : Jacob Khawlhring