​Cavani leh Di Maria an inthleng dawn ?

29th June 2015, 12:06AM

Manchester United chuan striker tha tak an mamawh avangin an winger Di Maria leh Cavani chu PSG inthlengpui an tum dawn niin Daily Star Pathianni chhuakin a tarlang.

PSG hian season liamtaa United in Real Madrid atanga club record-a Di Maria an lakluh hi an beisei ve hle a, chutih laiin Di Maria chuan Old Trafford chhuahsan a tum loh avangin indawrna a la kal tak tak thei lo niin a lang.

Hetih lai hian Man Utd chuan PSV atangin Depay an lalut tawh bawk si a, Di Maria mamawhna an nei tam tawh lo a ni mahna, winger ai chuan striker tha tak an melh mek niin a lang. Uruguay chu Copa America quarter final atangin tla mahse Cavani that zia kan hmu tho tho a, PSG chuan Di Maria an lo duh ve bawk si nen, United hian inthleng pui mai an tum dawn niin Daily Star chuan a tarlang a ni.

Sapram chanchinbute chuan Morgan Schneiderlin chu United ta a nih tawh thu an tarlang nasa hle a, Man Utd chuan he French midfielder manah hian £25million lai Southampton an pe dawn niin an tarlang a, Mirror chuan tun nilaini hian Schneiderlin chuan Old Trafford a pan dawn thu a tarlang nghe nghe a ni.

Manchester United chuan Real Madrid defender Sergio Ramos an beisei a, mahse Real Madrid chuan an defender manah £63million lai an lo chhiar niin Sunday People chuan a tarlang. Report thenkhatin a tarlan dan chuan United hi an la beidawng lova, £42.5m vela Ramos lakchhuah tumin United hi an che chhuak leh dawn niin an sawi.

Mata chuan loan-a Real Madrid pan Javier Hernandez chu Old Trafford-a cham chhunzawm turin a duh hle a, Hernandez hian season liamta khan Real Madrid tan game 32 khelin vawi 11 chiah a start a, Real Madrid chuan hawh chhunzawm an tum tak loh avangin Carrington training ground-ah pre-season training tan turin a hawng leh dawn ta a, kum 27 mi hian Old Trafford-ah kum khat chiah contract a nei tawh a, a hma hun hi a chiang lo hle a ni.

Copyright © inkhel.com 2024. All rights reserved.