Cavani chelh kan duh chhan a lang: Solskjaer

07th May 2021, 11:05AM

Manchester United chuan Europa League final an luta, final lut tur hian semi final-ah Roma an hneha, Roma lakah hian United striker Edinson Cavani chuan goal li ngawt a khung.

Roma lakah hian United hian 6-2 in first leg-ah hnehna an changa, second leg-ah erawh 3-2 in tlawm mahse 8-5 in aggregate-ah hnehna an changa, first leg leh second leg-ah Cavani hian goal hnih ve ve a khung a ni.

United hian nikum nipui bazar lai khan kum 34 mi Cavani hi free transfer-in an laluta, kum khat daih contract ziahpuiin, tun season zawhah Cavani-a contract neih lai hi a tawp dawn.

United manager Ole Gunnar Solskjaer chuan Cavani hi contract thar ziahpui an duh thu a sawi fo tawha, mahse Cavani hi South America lama kir duh anga sawi a ni nen, tun thlengin contract thar chungchangah United leh Cavani te hian inremna an la nei lo.

Solskjaer chuan Roma lakah Cavani an chelh duh chhan a lan thu sawiin, “Final kan thlen theih chhan pakhat hi semi-final a goal li khung centre-forward kan neih vang a ni a, Edinson hian Old Trafford-a cham tura kan duh chhan chu a lan tir leh ta a ni.

“Edinson hian zanin mai nilo, a hma atang tawhin centre-forward in khelmual chhung leh khelmual pawna an tih tur tak a lan tir reng tawha, game khelh hmaa a inpuahchah dan leh, game khelh hnua a in recover danah kan hmu. Professional dik tak a ni a, ka team-a player zawng zawngte hian a lak atanga zir tur an nei a ni,” a ti.

Copyright © inkhel.com 2024. All rights reserved.