Uruguay Striker hi chhuak tur anga sawi ni fo mahse tun tum chu a chhuak tak tak dawn a ang hle. PSG Coach Manchester United Defender hlui Laurent Blanc chuan Cavani khawsak danin a tih lawm loh thu a sawi.
Cavani hian kum 2013 khan £55m-in Napoli atang PSG a zawm a, a man to viau mahse Swede Ace Zlatan-a luahlan thei meuh lo. Striker a khelh duh Cavani hi left-wing-a khelh tir a nih avangin a lawm lo hle a ni. Blanc chuan Cavani chungchang sawiin," Cavani khawsak dan hian harsatna min siam chiang a, nimahsela ka tih tur chu team tana tha ber tur ka ngaihtuah a ngai a ni" tiin Striker a khelh chuh mahse Ibrahimovic chu team tana tha zawk a nih thu hriat theih takin a sawi.
Blanc hian sawi zawm zelin," Staff meeting kan nei a, kan thu ngaihtuah tam tak zingah Cavani chungchang pawh hi a tel a ni. Mimal duhdan hian team a nghawng tur a ni lo. Goal a thun thei tih chu ka hria, nimahsela hmun danga khelh a duh niin a lang" tiin Cavani chu chhuak thei a nih thu a sawi. Cavani hian December thlaa St Etienne laka chakna goal a khung hnuah PSG tan a la khel leh lo a, zirtawpni a PSG-in Ligue-1 a Bastia an hneh tum pawh khan a khel lo bawk a ni.
Oliver Giroud che tha viau mahse world class striker a ni lo tih phat chi a ni lo, Gunners Legend Henry phei chuan a sawisel chiam tawh a nih kha. Arsene hian Cavani hi a lalut a nih ngat chuan a la champion lohna Champions League-ah pawh hian an thlen san phah hle ang. Manchester United goal thun theih loh zia kan hria, Rooney tun hnaiah che tha mahse kum 30-a tlin tawh avangin kum tam a nei tawh lo. Martial a la naupang si a United anga club lian tan chuan inngah ngamna chi a la ni lo. Cavani hian goal thun a harsat lo hle a, Napoli tan game 104-ah goal 78 teh meuh a khung thei a, tun season Ligue-ah pawh game 16-ah goal sawm a thun tawh bawk a ni.