NBA Eastern Conference finals an khel chho zel a, Boston Celtics chuan anmahni mualah Cleveland Cavaliers an lo hneh a, best-of-seven series-ah 3-2 in hma an hruai.

Rookie Jayson Tatum chuan point 24 a score a, postseason-ah point 20 score tlin hi vawi 9 a nei ta chiah a. Boston hian Cavaliers hi 96-83 in an hneh a, a zawnin Boston-ah hian vawi 10 an chak tawh a, vawi khat an chak leh a nih chuan 2010 hnua a vawi khatna atan NBA Finals an lut ang.

Game 6 hi Cleveland lama khelh tur a ni a, Game 7 khelh a ngai a nih chuan Boston court-ah an khel ve leh ang.

Al Horford chuan point 15 a score bakah rebound 12 a la a, kum 21-a upa Jaylen Brown chuan Boston tan point 17 a score a, Tatum chuan rebound 7, assist 4 leh steal 4 a nei bawk.

Cavaliers tan Kevin Love chuan point 14 a thun a, anni team hian a zawnin season 4 chhung chu NBA Finals hi luh an tum hle a, coach Tyronn Lue chuan, “Kan tum ber leh LeBron pawhin a tum ber chu chak a ni. Chu chiah chu tunah chuan a pawimawh,” a ti.

Celtics chuan inkhel an thunun nghal a, first quarter-ah double-digit in hma an hruai hman a, a tawp thlengin an khelhpuite hi an inpawhthlaktir lo tluanchhuak a. Reserve pahnih, Marcus Morris leh Marcus Smart te chuan point 13 ve ve an rawn thun a ni.