LeBron James zarah Cleveland Cavaliers chuan Toronto Raptors an hneh a, NBA Eastern Conference finals an lut chiang ta a, Boston leh Philadelphia intuma chak zawk zawk an hmachhawn ang.

James hian point 29 a thun a, Cleveland chuan 128-93 ngawtin Toronto hi an hneh a, 4-0 in an chak a. Toronto hi Eastern Conference-ah top seed an ni a, an beisei ram an thleng zo ta lo a, a zawnin Cavaliers hi vawi thum an hneh lohna a ni a, 2016 leh 2017 ah pawh an lo hneh lo tawh a ni.

An inkhelah hian LeBron chuan point 29 a score mai bakah rebound 8 leh assist 11 a nei bawk a. Cavaliers tan hian Kevin Love pawhin point 23 a score a Kyle Korver chuan point 16 a score bawk a. J.R. Smith chuan point 15 thunin, George Hill pawhin point 12 a thun bawk.

Cleveland coach Tyronn Lue chuan Cavaliers ho defence leh all-round offensive play chu an chakna bulpui a nih thu a sawi a. “Defensive game tha tak kan khel thei a, offensive-ah lah kan ngaihtuahawm lem lo viau bawk a. Player hrang hrangin point an score thei hlawm a, beisei a sang khawp mai,” a ti.

Toronto tana hun duhawm lo takah hian DeMar DeRozan chu fourth quarter-ah a chhuak a, Kyle Lowry chuan point 5 chauh a score bawk a. Jonas Valanciunas chuan bench atanga a luh hnuah point 18 chu thun mahse awmzia a nei thui ta lo.

Hmun danga inkhelah T.J. McConnell leh Dario Saric te inkawp chuan Philadelphia 76ers tan beiseina thar an siam a, 103-92 in Boston Celtics an hneh a, game 5 an khelh leh ngei a ngaih phah a ni.

Celtics hian 4-0 a chak theihna hun an bawhpelh a, Sixers an chak takah chuan Nilaini hian Boston-ah an inkhelh leh a ngai dawn a, Celtics hian vawi khat chak chiah an mamawh tawh avangin an dinhmun a tha zawk daih a ni.

Sixers hian McConnell chu bul an tantir a, an tifuh hle a, point-guard hian point 19 zet a score a. Croatian power forward Saric chuan point 25 a thun a, Ben Simmons chuan point 19 thunin, Joel Embiid pawhin point 15 a thun bawk.