Cavaliers in Celtics an nihrual chiah

23rd May 2018, 12:05AM

NBA Eastern Conference finals khelh chhunzawm a ni a, Cleveland Cavaliers chuan Boston Celtics an hneh a, 2-2 in an inhnehtawk chiah.

He inkhelah hian LeBron James chuan point 44 ngawt mai a score a, playoff bikah field goal thun hnem ber a ni ta a, Kareem Abdul-Jabbar record ding lai 2,356 chu a khum a, Cleveland Cavaliers chu 111-102 in a chakpui.

Nilaini hian Boston-ah game 5 an khel leh dawn a. Helai hmunah hian Boston hi an hlauhawm khawp mai a, tun season zawh hnu ringawtah vawi 9 an court-ah hian an inkhel tawh a, an la chak kim vek a ni.

NBA khawvelah team 300 zet chu 2-0 a hnufual an awm tawh thin a, heng zinga 19 te chuan an khingpuite an pawhthlak mai bakah, an lehthal a, a chak zawkah an tang thei a. Hetiang deuh hian Cleveland pawh hi 2-0 in an hnufual zet a, tunah chuan 2-2 in an inhnehtawk a, a umtu zawk chak thei zinga 20-na nih an tum hle a. An chak a nih chuan James hian a zawnin finals vawi 8 a lut tling chiah ang a, trophy pathum a la thei tep tawh a ni.

Tristan Thompson chuan Cavaliers tan point 13 a score a, rebound 12 a la a. Kyle Korver chuan point 14 a thun a, vawi 3 block a nei bawk a. Point 44 score tu LeBron hian season zawh hnu game-ah point 40 aia tam vawi 4 a score tling ta a, playoff bikah point 30 hi vawi 22 a score tling ta bawk.

Jaylen Brown chuan point 25 a score a, Boston player panga chuan double figure an score hlawm a, an chak zo ta lo thung.

Copyright © inkhel.com 2024. All rights reserved.