Italian GP-a pakhatna a nih hnuah Ducati rider Andrea Dovizioso chu Catalunya GP-ah pakhatna a ni chhunzawm a, Moto 3 leh Moto 2-ah Spanish rider te chungnung mahse MotoGP-ah chuan Italian a chungnung a ni.

Qualifying-ah Spanish rider pahnih Marquez leh Pedrosa te che tha hle mahse intlansiak tak takah erawh Ducati rider Dovizioso chu a chungnung ta ber a, a zawna pakhatna a nih avang hian championship-ah pawh hmahruaitu Yamaha rider Marverick Vinales chu point 7 chiahin a thlau ta a ni.

Spain khaw lum tak karah rider tinin an tyre an ngaihtuah vek a, tlan fua fua ringawt a tawk lo, lap tawp ber thlenga chak taka an tlan theih nan an tyre an ren thiam a ngai.

Lorenzo chuan bul tha takin tan mahse intlansiak laklawh laiah a tawlhhnung ta a, Marquez chuan hma hruaiin a team-mate Pedrosa chuan a zui. Mahse Ducati an rawn chungnung ta, Dovizioso chuan hma rawn hruai chhoin, a tawp thlengin a chungnung ta a ni.

"Tlankawng danglam tak a nih avangin rider tin ten temperature ngaihtuah chungin kan tyre kan veng ran. Intlansiak danglam bik tak a ni, lap tinah khan kan duh anga chakin kan tlan ngam lo vek.

"Ke hnung zawk kha a ral chak em em a, chutih laiin kan bike a tha a, kan tlan chak thei a, kawia nawr vak vak ngai kher lovin ka tlanchak thei ta hlauh a ni," tiin pakhatna Dovizioso chuan a sawi.

Marquez-a nau Alex chu Moto 2-ah pakhatna a ni a, a hnampui Joan Mir chu Moro 3-ah pakhatna a ni bawk. MotoGP-ah Pedrosa chu pathumna niin Catalunya tlankawnga chungnung thin Marquez chu pahnihna a ni a, pakhatna ni zo lo mahse Marquez a lawm hle a, season tluana a chunglama awm a tum thu a sawi bawk a ni.

Catalunya MotoGP results:

1. Andrea Dovizioso (Ita) Ducati 44:41.518 mins

2. Marc Marquez (Spa) Honda 44:45.062

3. Dani Pedrosa (Spa) Honda 44:48.292

4. Jorge Lorenzo (Spa) Ducati 44:51.126

5. Johann Zarco (Fra) Yamaha 44:55.356

6. Jonas Folger (Ger) Yamaha 44:55.439

7. Alvaro Bautista (Spa) Ducati 44:58.281

8. Valentino Rossi (Ita) Yamaha 45:02.339

9. Hector Barbera (Spa) Ducati 45:05.470

10. Maverick Vinales (Spa) Yamaha 45:05.707

Championships standings:

1. Maverick Vinales (Spa) Yamaha 111

2. Andrea Dovizioso (Ita) Ducati 104

3. Marc Marquez (Spa) Honda 88

4. Dani Pedrosa (Spa) Honda 84

5. Valentino Rossi (Ita) Yamaha 83

6. Johann Zarco (Fra) Yamaha 75

7. Jorge Lorenzo (Spa) Ducati 59

8. Jonas Folger (Ger) Yamaha 51

9. Cal Crutchlow (GB) Honda 45

10. Danilo Petrucci (Ita) Ducati 42