Thawhlehni zan khan Manchester United chu Selhurst Park-ah 4-0 laiin an tlawm, United player te an khel chhe hlawm hle a, chechhe zinga langsar ber chu Casemiro a ni.

Erik ten Hag chuan defender 7 lai inhliam a nei, centre-back lamah pawh indaih lohna a nasa em em a, Brazil midfielder Casemiro chu centre-back ah a chhawr ta, mahse a tisual hle.

Ten Hag chuan Evans leh Casemiro te a inkawp tir a, United tlarhnung a phui lo hle. Casemiro phei chu Palace hmatawng ten vawi 8 lai an bum tlang. Palace tan Olise chuan goal hnih a khung a, Mateta leh Mitchell ten goal khat ve va an khung bawk.

Sky Sports pundit Jamie Carragher chuan Casemiro chu league nem zawkah kal tawh mai se a duh thu a sawi chhuak hial.

"Half time-ah ka sawi chhuak nghe nghe, Ten Hag khan Casemiro kha la chhuak tawh mai se ka ti. Bench lamah naupang zawk an awm a, Casemiro hian top level-ah chuan a theihna a hrechiang tawh khawp ang.

"MLS lamah emaw Saudi lamah emaw kal mai a rilruk tawh ka ring a ni. 

"A vanglai chuan player ropui a ni alawm, kei hi chuan a theihna, thiamna leh a trophy hlawhchhuah te hi ka phak lo nasa lutuk. Real Madrid leh Brazil tan player ropui taka  ni.

"Football ka chawlhsan khan ka rilrua awm chu, football-in min hnuchhawn hma ngeia football chawlhsan a tha a ni tih hi a ni," tiin Carragher chuan a sawi.

United boss Erik ten Hag chuan Casemiro chauh a dem duh thak lo. 

"Inkhelh hmain khelh dan tur kan inhrilh nasa, mahse player thenkhat ten ka thusawi an zawm lo a, goal ho takin kan chhuah a ni. Kan mual veilam lamah pawh harsatna kan tawk nasa hle bawk.

"Casemiro thiam loh bik a ni lo, team pumpui kan khel tha tawk lo a ni," tiin Erik ten Hag chuan inkhelh zawhah a sawi.