Caroline Wozniacki chuan Australian Open ah amah aia rank hniam zawk a hneh lo a, tennis khelh a chawlhsan dawn ta.

Zirtawpniah Caroline Wozniacki hi Tunisia mi Ons Jabeur nen an inkhel a, third round inkhelah hian world number one pawh lo ni tawh, Denmark mi, nikum December thlaa a chawlh tur chungchang lo sawi tawh hi 5-7, 6-3, 5-7 in a chak ta lo a ni.

Kum 29-a upa Wozniacki hi tun tumah hian unseeded niin, a vanglaiin WTA title 30 a la hman a, Grand Slam title hi pakhat chiah a la a, 2018 ah khan Melbourne Park-ah a champion a ni.

An inkhelh zawhah Wozniacki chuan, “Ka match khelh hnuhnun ber set thum a ni thei hi a lawmawm hrim hrim a, tennis khawvela ka hun hnuhnung ber chu forehand error in ka khar a ni,” a ti.

“He hun hi pumpelh theih a ni lo a, min rawn nangching ve ta reng mai chu a ni a. Court chhungah tun hma atang tawhin hun hlimawm tak tak, theihnghilh harsa tur deuh deuh ka hmang chho nasa hle a. Mipui lamin min tawiawm tha thei hle a, an zarah thil chhinchhiah tlak tak tak ka tawng teuh a ni,” a ti bawk.

A sawi zelnaah, “Ka inkhelh tan atanga tun thlenga min thlawp tlattu ka chhungkhat lainate chungah lawmthu ka sawi a, a bik takin min kaihruaitu ber ka pa chungah lawmthu ka sawi mawlh mawlh a ni,” a ti.

“A nazawng hian ka tap ngai lo hle a, tun tumah erawh insum harsa ka ti a. Hun danglam tak mai ka tawng mek a, bul ka tan lai atanga tun thlenga ka zinkawng hi ka chhui let a, chanchin ngaihnawm tak tak a tam hle a, zinkawng zawh nuam tak mai a ni,” a ti a.

“Tunah chuan bung thar ka kai dawn ta a, eng thil nge lo thleng zel dawn tih ngaichang chungin rilru thar ka pu tawh dawn a ni,” tiin a sawi.