Sir Alex Ferguson-a'n amah thlak tura a sawm; Cristiano Ronaldo, Paolo Maldini leh John Terry-te'n a mimal nun leh a football hriatna avanga hahipa an fak rawn Carlo Ancelotti hi a chanchin hriat belh miah lo pawhin amah faktute aṭang ringawt pawh hian football-a milian a ni tih hmuh hmaih rual a ni lo.

He Italian tactician hian Real Madrid a chhuahsan hnuah Real Madrid bawk a pan leh ta. Football khawvela coach ropui ber pawlin European football-a club ropui ber a zawm hian boruak a nei lian hle mai.

He pa hi footballer hlawhtling tak a ni a, khawvela a thiam ber zinga sawi tel ni kher lo mah se European Cup (Champions League a nih hma) champion team-ah vawi hnih telin an player pawimawh a ni a, World Cup-a pathumna ni thei team-a mi a ni. Parma, AS Roma leh AC Milan-ah khelin vawi 338 zet midfield-ah a inlan thei a, player naran chung lam a ni tih chu a chiang - Italy kawr pawh vawi 26 zet a ha ve bawk.

Real Madrid-in indin thar leh an tumna kawnga coach ni tura an thlang nawn leh ngat hian he pa hlutna hi a tisang zual a, manager ropui a nihzia sawi nawn ngai lo khawpa khawvel hriat a ni tawh chungin kum 61 a nih hnua Real-in an la ko lawm lawm hian 'Ancelotti nge nge' a tih loh theih loh.

'Real Madrid-in Ancelotti lak let tumin Everton an bia,' tih thuthang a awm aṭangin headline a ni chuai chuai a, Real-in an la fel ta tih a chian rualin a chanchin ziakna hrang hrangah fakna lam lo chu chhiar tur a vang hle.

He pa, football khawvela mi ropui hi a bul tanna a tlawm a, khelmuala a hlawhtlin hnu pawhin a chapo chuang lo a, football coach hlawhtling ber pawl a nih pawhin a la inngaitlawm reng a, club ropui leh lianin hlawhtlin an tumna kawngah an inkawl chhawk sek chu a ni ber e.

REGGIOLO KHAW NAUPANG 

Ancelotti hi Italy-a khaw lian lo tak mai Reggiolo-a chhungkaw naran ve takah 1959 khan a lo piang a; footballer tam takte ang bawkin eizawnna atan football hi a 'mamawh' a ni. A pa hi kuthnathawka eizawng 'cheese farmer' a ni a, amah pawh farm-a sei lian a ni.

An chhungkaw khawsak dan a hmu a, an eizawnna a hniam a, Ancelotti hian eizawnna dang a mamawh tih a hria. Football lamah a rilru a pe ta a, "Football hi ka tan chuan hna leh eizawnna mai a ni lo, farm-a sei lian tan chuan dinhmun ṭha zawk ka thlen theihna a ni," a ti.

Cheese farm enkawltu a pa Giuseppe chuan a fapain football lama kal a duh thu phalsakin kum 14 a nihin an khaw club Reggiolo Club a zawm. Football chu a lo timi phian a, he club-a a awmlai hian an ṭhenawm khaw club lian Parma scout-in a hmu fuh a, a football nun a inṭan ta a ni.

An khua a tein a la thingtlang a (tunah pawh mi 10,000 vel lek an ni), chuta ṭanga Parma lama kal chu Ancelotti tan thil tam tak inzir chawp a ngai. Ancelotti chuan hemi kawngah hian a pain a pui nasa tih sawiin, "Ka zirtirtu hmasa leh ka manager hmasa a ni," a ti.

Ancelotti hian amah hmangaihtu a pa hi a dah pawimawh khawp a, Chelsea a enkawl lai khan a pa hi kum 80 chuang ni tawhin Italy-ah a damlo a, a khat tawkin a haw reng a, Chelsea team enkawltu mah ni se a pa enkawl chu a 'duty' a nih thu a sawi nghe nghe a ni.

Parma lamah a professional hun bul a ṭan a, Roma-ah insawnin Serie A champion a nihpui a, hming a chher hle. Milan vanglaia khel phak khawpa player ṭha niin 1989 leh 1990-a European Cup-a an champion theihna tura player pawimawh a ni phak - hei hian khelmuala a theihna a tichiang hle.

Milan-a a awmlai hi Milan ropui vanglai tak a ni a, khawvela club ṭha ber an nih bakah hetih hunlai leh tun hnu thlenga khawvel footballer ropui - Paolo Maldini, Franco Baresi, Frank Rijkaard, Ruud Gullit, Roberto Donadoni leh Marco van Basten-te nen team khatah an awm a ni.

Reggiolo khaw naupangin football-a a thil tawn hi a ropui bawk a, "Reggiolo khua hian chhuan tur a nei tam lo a, cheese siamna hmunpui a nih leh Ancelotti pianna khua a nih chiah hi a hmingthanna a ni," tiin an sawi ṭhin a ni.

SACCHI KE BULA SEI LIAN 

Khelmualah hlawhtling taka hun a hman hnuah a inhliam fo avangin 1992-ah football a chawlhsan. Football khelh a chawlhsan chiah a, a football 'nun tak tak' a hun a inṭan e! Khelmuala hlawhtlinna ropui tak a neih hnuah khelmual sirah a ropui leh zualna bul a ṭan a, football manager ropui ber zinga mi Arrigo Sacchi hnuaia bul a ṭan hi a vannei takzet a ni.

1987-1991 inkara AC Milan enkawltu Sacchi hi Italian football fans tam tak chuan khawvela football coach piang tawha ropui berah an ngai hial a, hei hi Italian ni kher lo zingah pawh ṭawmpuitu an ṭhahnem hle ang. Thil danglam tak mai chu amah Sacchi hi footballer a ni lo - pheikhawk dawrahte a thawk ṭhin a, chumi hnuah football coaching lam a luhchilh a, 'hneh theih loh' team a din ta hial a ni.

Football khel thiam si lo chunga coach a ni chu mi ṭhenkhatin an sawisel a, he mi chungchanga a thusawi, "Sakawr khalh thiam tak (jockey) ni turin sakawr nih kher a ngai lo," a tih hi tun thlenga football chungchanga thusawi hmingthang a la tling.

Milan a enkawl chhungin Italy-ah ro an rel a, an ram zauhin Europe-ah ro an rel ta zel a, European Cup a zawnin an la thei. Chumi hnuah 1994 World Cup-ah Italy enkawlin final a thlenpui a,  final-ah penalty shootout-ah Roberto Baggio-a'n penalty pet goal loin Brazil lakah an vanduai ta a nih kha. He pa, "The Prophet of Fusignano" an tih ṭhin Sacchi hian a hun tawp lamah amah pui turin a player hlui pa fing tak a sawm a, chu pa chu Ancelotti hi a ni.

Ancelotti hi 1992-1995 chhung Sacchi hnuaiah a inzir a, kum 36 a tling ta tihah coach puitling nih a tum ve ta.

KA PU TIH DAN BAK KA HRE LO! 

1995-96 season-ah Serie A aṭanga Serie B-a tla hlim Reggiana chuan Serie A-a kaisanpui theitu tur coach an zawng a, coach tawnhriat ngah tak tak karah Reggiana president chuan coaching license pawh la nei lo Ancelotti chu an thlang mauh mai.

Reggiana-in Ancelotti an ruai hi amah pawhin mak a tih thu tun hnuah sawi lehin, "Reggiana president khan coach ni turin player anga tawnhriat nei ṭha leh an state (province) mi leh sa a duh a, khatihlaia a adviser kha chu ni ila, 'Chutiang mi kher chu eng nge a ṭulna? Coaching license pawh a nei lo a, team enkawl turin tawnhriat pakhatmah a la nei lo a, player ṭha pawh lo ni ṭhin tehreng se chu chu chhawr theih a ni tawh lo...' ka ti ngei ang. Nimahsela vanneihthlak takin he football khawvel mak tak hi ka tana ṭha turin a inher rem a ni ber mai," a ti.

Amah puitu tur, assistant coach leh goalkeeping coach ni kawp thei tur a zawng a, hual lawk pawh a nei lo. Italy-a football coach hming inziah tlarna a en a, alphabetical order-in a zawng tawp mai!

Coach zingah an awmna hnaia lo awm remchang a hmuh hmasak ber, a hmelhriat pawh ni lo Giorgio Ciaschini chu a sawm ta. An insawm fuh khawp a, kum 20 chhung an thawk dun - Ciaschini nen hian Parma, Juventus, Milan, Chelsea leh Real Madrid thlengin an inzui a ni.

Reggiana chuan coach tawnhriat nei lo chu an ruai ta a, a game hmasa pasarihah chak an nei lo. Press lamin an sawisel a, fans an thinrim a, amah Ancelotti pawh a buai hle, "Dik tak chuan khatihlai khan ka talbuai a, Sacchi tih dan entawn chiah kha ka thiam a, a bak chu Chiasquini khan min pui nasa a, training pek dan pawh kha ka la thiam lo a ni," a ti!

Game hmasa pasariha chak nei lo kha a insiam ṭha a, season a zawh meuh chuan Reggiana chu Serie A lamah a kirpui thei a, season tawpah a hna hi a chawlhsan zui.

A team enkawl danah Sacchi tih dan entawn bak thiam a nei lo tia an sawiselna chu a ṭha zawnga dawngsawngin, "A pawi ka ti lo. Sacchi tih dan chiah chiah hi ti thei ila duhthusam a ni," a ti. Ancelotti hian a pu hi a ngaisang khawp a, "Sacchi kha chuan football hi a hria a ni. Football ka hre ve hle emaw ka lo intih kha a bula awm khan  ka hriat lohzia min hriattir a ni ber," a ti hial.

A PIANNA RAMAH A KIR 

A club enkawl hmasak ber a chhuahsan hnu hian a football nun bul ṭanna Parma enkawl turin an ruai nghal. Ancelotti hian he club-ah hian football khawvela mi ropui ni chho ta Gianluigi Buffon leh Fabio Cannavaro-te a enkawl a, anni hi chu ṭha taka a chhawr thiam laiin hetihlaia star player Gianfranco Zola leh Hristo Stoichkov-te erawh a chhawr fuh hleithei lo.

Sacchi aṭanga a rochun 4-4-2 formation bak a hmang duh lo a, a formation hman thiama insiam rem thei lo super star Zola leh Stoichkov a hralh tak hial avangin sawisel a hlawh a; nimahsela Serie A-ah a team-te pahnihna a nihpui theih avangin fak a hlawh thung.

Parma-in hmasawn an duhna kawngah Roberto Baggio lei an duh a, an boss ber hian ṭul a ti tlat lo a, a khelhtir dan system leh Baggio khelh thiam dan hi a inmil lo a ni tlat a, an lei ta lo - Ancelotti hian hei hi chu a hnuah a inchhir thu a sawi nghe nghe a ni.

Parma-ah hian bul ṭan fuh hle mah se Champions League khel phak loa 1997–98 season a hman zawh avangin an ban ta - he mi hnu hian a ropuina a inṭan dawn chauh a ni

MILAN-AH BAWK... 
Coach tawnhriat ngah tak la ni lo mah se Juventus lamin an manager kumhlun Marcello Lippi thlaktu atan 1999 khan an ruai a, hetah hian Real Madrid lama a assistant ni zui ta leh tuna a thlak lêt leh tak Zinedine Zidane nen an intawng ṭan.

A season hmasa berah Juve hi UEFA Intertoto Cup-ah champion pui mah se Serie A-ah pahnihna an ni a, beisei angin champion nomawi a lakpui thei lo nen kum 2001-ah an ban ta. Hei hi Ancelotti ropuina inṭanna chiah a ni - Juve duh loh hi Milan-in an duh.

2001-2002 season-ah Milan-in bul an ṭan ṭha lo a, season laklawhlaiin an manager - Turkish manager lar Fatih Terim chu an ban. A thlaktu tur an zawng a, an player hlui Juve lamin an ban tak Ancelotti chu an lalut.

Milan-ah hian Anelotti hian a football hriatna tak tak a pho chhuak ta a ni ber mai - attacking midfielder ṭha zet Andrea Pirlo chu defensive midfielder-ah a let a, mi tam takin an sawisel chu Milan ropui lehna bul inṭanna a ni ta. Pirlo a thiam a, a hmaa tlat tur player an thlang thiam bawk nen 2003-ah chuan Champions League champion an ni der tawh - final-a an hneh chu amah bântu Juventur an ni!

2004-a Serie A an champion ṭumin point 82 hmuin record thar an siam a, 2005 Champions League final-ah champion tura an inrin hnuah Liverpool-in Istanbul-ah mak tak maiin an lehthal.  2007-ah erawh a vanduai nawn tawh lo a, Milan chu Champions League nomawi a chawipui leh ta - final-a an hneh chu a hmaa an hneh loh Liverpool an ni a, phuba a la ta.

KHAWVEL INCHUH CARLO

Champion theihna zawng zawnga a champion-pui hnuah khawvel club lianin an inchuh ṭan ta - hlawh säng tak tak hlawh turin a kal kual ṭan ta. 

2009-ah Chelsea-ah a kal a, a season hmasa berah Premier League leh FA Cup-ah a champion nghal a, Italian manager zinga English league-a champion thei hmasa ber a ni.

2011-ah Paris Saint-Germain lamah kalin French League a champion leh bawk a, a khawih apiang rangkachakah a chang a ni ta ber mai.

2013-ah Real Madrid-in an ruai a, 2014-a Champions League-a a champion-pui hi Real-in an theihnghilh tawh lo - La Decima an tih a vawi 10-na atan an champion a ni mai lo a, kum 12 zet an champion theih tawh loh hnuah an champion a, final-ah an ṭhenawm Atletico Madrid an hneh.

Real a chhuahsan hnuah Bayern Munich enkawlin Bundesliga-ah a champion-pui leh a; Italy-a kira Napoli lama a kal hnuah Everton-in indin thar leh duhin an ruai a.... tun hi a thleng ta a ni - Real-ah bawk a kir leh dawn.

CHHUNGKAW ṬANG RUAL 

Kum 61 a ni ve tawh a, mahse a la tar lo. Real Madrid-in an sawmna chu, "Hnar phal chi a ni lo," a ti a, Everton chu zah tak chungin a chhuahsan ta mai tih a sawi.
Everton lama amah puitu a fapa Davide Ancelotti chu assistant-ah a chhawr zui rin a ni.

Carlo hian a fapa Davide hi a fapa a nih vanga chhawr a ni lo a, "Ka duh angin a thawk thei a, min pui nasa a, a ṭangkai hle a ni," a ti. Kum 31 mi hian sports science lamah degree a neih bakah tawnhriat a nei ṭha hle - PSG-ah fitness coach a lo ni tawh a, Real Madrid-ah pawh hian a pa hunlaiin fitness coach a lo ni daih tawh.

Carlo hian a fapa hi a ring tawk a, Bayern a enkawl phei kha chuan assistant coach-ah a hmang tawh a, Napoli leh Everton lamah pawh a fapa hian a pui chhunzawm ta zel a - UEFA A License an exam ṭum pawhin a tiṭha hle nghe nghe a ni.

A pa a lo upa ve tawh bawk nen Everton-a an training session tam tak hi chu Davide zawk hian a kaihruai a, a pa nen pawh thil ṭhenkhatah an inhnial ve bap bap ṭhin. Davide chuan, "Assistant coach ka ni a, engkim mai ama duh dana kalpui vek tur a ni bik lo a, inrintawkna ka nei a, ngaihdan ka nei a, a chang chuan ka hnial ṭhin a, thutlukna siamtu erawh amah a ni," tiin a pa nen an inkar thu a sawi.

Ancelotti fanu Katia pawh hi football lam mi bawk a ni a, a pa Chelsea-a a awmlaia a PhD thesis ziah chu Chesea leh AC Milan marketing leh media inlaichin dan khaikhinna lam a ni.

Katia pasal hi nutrition specialist Beniamino Fulco a ni a, ani pawh hian a puzawn hi a zui deuh chawt a - Real Madrid, Bayern Munich, Napoli leh Eveton lamah nutritionist a ni. 

Ancelotti chuan Madrid lamah hna thar a hmù leh ta a, a mei ang maia amah zuitu a fapa leh a makpa hian an zui leh ngei tura rin a ni. 

MILAN VERSUS REAL! 

Real Madrid chuan boss thar an nei - he pa, an boss thar hi footballer a nihlaia a chet ropui bera an ngaih chu 1989 European Cup semi-final ah khan a ni.

He mi ṭum hian AC Milan leh Real Madrid an inkhel a, Milan legend Ruud Gullit chuan a teammate pakhat chu ball a pass phei a, ani hian Real player pahnih a bum hnuah hla tak aṭangin kawh em em maiin a pet goal - he inkhelah hian Milan hi 5-0 in an chak a, European champion an ni zui.

Kum 2021 a ni a, Real Madrid chu European champion nih leh an duh a, 1989-a an lama goal ropui khungtu Milan legend chu coach atan an ruai ta - a hming chu Carlo Ancelotti a ni a, Reggiolo khaw naupang kha a ni e.

A hun hmasa kan hria. A hmalam hun erawh Real Madrid coach hna a nih miau avangin 'sawi lawk theih loh' tih chin bâk hi sawi lawk theih a ni lo.

Note : He thu hi Real Madrid-in Ancelotti an chhawr leh dawn laia Tetea Hmar ziak a ni.