Zanin Premier League inkhelah kai thar Cardiff City chuan Arsenal lo mikhualin, mual neitu lam hi 3-2 in an tlawm.
Arsenal tan hian Shkodran Mustafi, Pierre-Emerick Aubameyang leh Alexandre Lacazette-te chuan goal khat theuh khungin, Cardiff tan hian Victor Camarasa leh Danny Ward-te chuan goal khat ve ve an khung bawk.
Arsenal hian khelh liah game hnih chakin, game hnih dangah an tlawm a pakuanaah an awm meka, Cardiff hian khelh liah chak la nei lovin, vawihnih an chak lova vawihnih dang an tumpuite an inhnehtawk pui a ni.
Cardiff City 2-3 Arsenal
(Camarasa 45+2’, Ward 70’) (Mustafi 11’, Aubameyang 62’, Lacazette 81’)
PLAYER RATINGS
Cardiff: Etheridge 7, Ecuele Manga 6, Morrison 7, Bamba 6, Bennett 6, Arter 6, Camarasa 6, Ralls 6, Hoilett 7, Reid 7, Ward 7. Subs: Zohore 5, Madine 5.
Arsenal: Cech 5, Bellerin 6, Mustafi 6, Papastathopoulos 5, Monreal 6, Guendouzi 6, Xhaka 6, Ramsey 7, Ozil 6, Aubameyang 7, Lacazette 8. Subs: Mkhitaryan 5, Torreira 5, Welbeck 5.
Match Report
Inkhel bul tan tirah Arsenal goalkeeper Petr Cech chuan tisual nghalin, Cardiff lam hian goal-ah an chan tir lova, Arsenal an vannei hle. Corner atanga ball lokal chu defender Mustafi chuan mual neitu lam goal-ah kawh taka tauh lutin 11mins-ah Arsenal goal hmasa ber a khung.
Team hnihte an intum tawk angreng hle a, 1-0 a first half a tawp dawn emaw tih hnuin hun pek belhah Camarasa chuan Cardiff tan khung veleh in, 1-1 a first half tihtawp a ni. Camarasa goal hi tun season-a Cardiff-in Premier League-a an goal thun hmasak ber a ni.
Second-half tan a ni a, Arsenal hian first half aiin inkhel an thunun zawk a, gaolkeeper Cech bawk chuan tisual lehin Cardiff hian an hun tha hmuh an bawhpelh chiang hle. Vawi hnih lai mai Cech hian zaninah a tihsual avang hian international break zawhah Unai Emery chuan Cech aiah goalkeeper thar Bernd Leno a hman zawk a rinawm tawh hle.
Inkhel bul tan atanga darkar khat a liam meuh chuan Dortmund striker hlui Aubameyang chuan mawi takin Gunners goal hnihna a khung.
Aubameyang-a pet goal hnu lawk hian mual neitu Cardiff lam hian an siphurh sut ve lehin, striker Ward chuan mawi takin, Cech-a ban phak lohin goal-ah a tauh lut ve leh a ni.
Hemi hnu hi chuan Arsenal lamin game an thunun hneh hle a, ball possession pawh 80% chuang lai an nei.
81mins-ah Lyon striker hlui Lacazette chuan Arsenal chakna goal khungin, inkhel hi 3-2 a tihtawp a ni zui ta a ni.