Premier League inkhelah Liverpool chu Cardiff-ah zinin Cardiff City an tlawh a, Liverpool hi si hnih faiin an chaka, point thum hlu tak an hlawhchhuak.
Liverpool tan hian Georginio Wijnaldum leh James Milner-te chuan goal an khunga, Milner-a goal hi penalty spot atanga thun a ni.
Liverpool hian khelh 35-ah point 88 an hlawhchhuak tawh a, Premier League hmahruaitu ni mekin, pahnihnaa awm Manchester City aiin khelh khatin an khel tama, point hnihin an sang zawk mek. Cardiff hi tlak hlau an ni a, khelh 35-ah point 31 nei tawhin 18-naah an awm mek a ni.
Cardiff City 0-2 Liverpool
(Wijnaldum 57’, Milner 81’ pen)
PLAYER RATINGS
Cardiff: Etheridge 7, Peltier 7, Morrison 7, Manga 7, Bennett 7, Gunnarsson 6, Ralls 6, Mendez-Laing 7, Camarasa 6, Hoilett 7, Niasse 6... Subs: Bacuna 6, Murphy 6, Zohore 6.
Liverpool: Alisson 6, Alexander-Arnold 6, Matip 8, Van Dijk 7, Robertson 6, Henderson 8, Wijnaldum 7, Keita 7, Mane 7, Salah 7, Firmino 6... Subs: Gomez N/A, Milner 7, Fabinho N/A.
Match Report
Cardiff hian 4-1-4-1 formation an hmanga, Etheridge chuan si ban nghakin defence-ah Peltier, Morrison, Ecuele Mange leh Bennet te an intlar. Defence hma chiahah Gunnarsson dah niin, a hmaah Camarasa leh Ralls-te an awm a, a sirah Mendez-Laing leh Hoilett-te awmin hmatawngah Niasse chu maltlat tir a ni.
Liverpool-in an formation hman thiam 4-3-3 bawk an hmanga, Alisson Becker chuan si ban a nghak. Defence-ah Trent Alexander-Arnold, Joel Matip, Virgil Van Dijk leh Andy Robertson-te dah niin midfield-ah Wijnaldum, Naby Keita leh captain Jordan Henderson-te an awm thung. Hmatawgah tun season-a forward hlauhawm ber pathum Sadio Mane, Roberto Firmino leh Mohamed Salah-te dah an ni leh bawk a ni.
Inkhel tan a ni a, champion loh hlau leh tlak hlau intum an ni bawkah Liverpool leh Cardiff-te an hmuhnawm thawkhat hle. Liverpool hian nawr viau mahse Cardiff an khawng em ema, an goal an venghim tha viau bawk. Liverpool hian ball chang tam zawk mahse an hun tha neih chhunah Cardiff an hlauhawma, chance tha nei hmasa zawk pawh an ni.
Inkhel tan atanga minute sawm chuang khelh a nihin Hoilet-a shot chu dansak a ni a, Robertson chuan Mendez-Laing chu veilamah a lo chhaih buai ve reng bawk. Minute sawmhnih chuang hret khelh a nihin Mane chuan Firmino ball a pe, Firmino hian goal-ah shoot mahse goal-ah a chan tir thei lova, Liverpool tan chance tha lutuk a ni.
Darkar chanve chuang khelh a ni a, Cardiff goalkeeper Etheridge chuan Salah shot chu tha em em in a save a, Cardiff chuan goal an chhuah loh phah. First half tawp hma deuh lawkin Cardiff lamin chance tha zet mai an nei a, Cardiff hian corner hmu in Liverpool box chhungah ball an vawrh lut, Alisson chuan lo hnek chuakin Ralls chuan ball a changa, Ralls hian box chhungah vawrh lut lehin Niasse chuan a lo pet, mahse Alisson chuan a lo nam chhuak thei hram. First half-ah goal khung thei an awm lova, 0-0 in tihtawp a ni.
Second half an khel chho, darkar khat khelh a nih hma hretin Liverpool chuan goal an khung ta nge nge a, Alexander-Arnold chuan Cardiff box chhungah ball chu hniam teah a pe phei a, Wijnaldum chuan chiang takin goal-ah a lo pet goal zuia, 1-0 in Reds in hma an hruai.
Darkar khat chuang hret khelh a ni a, Liverpool lamin goal an khung teuh hle. Mane chuan Henderson chu ball a pe, yard 8 vela hla atangin Henderson hian a shoot-a mahse goal a pet khum. Hemi hnu lawk hian Cardiff-in an si phurh rulhna hun tha tak an neih an bawhpelha, Morrison chuan pet goal na hun tha tak a neih chu a chhawr tangkai lo.
80mins khelh chhoh a ni a, Liverpool-in penalty an hlawhchhuak ta tlat mai. Morrison chuan an box chhungah Salah ti tlu in referee chuan penalty a pe a, penalty hi Milner chuan petin goal-ah a chantira Liverpool in si hnih faiin hma an hruai. Minute sawmkuanaah Salah hun tha neih chu Etheridge chuan a lo dan sak leha, goal luh belh tawh lovin Liverpool 2-0 in an chaka, an champion lovang tih a sawi thei loh tulh tulh a ni.