Liam Smith chuan Saul Alvarez hneh lovin a WBO title kawl lai a hloh. Alvarez hian Smith hi round 7-naah a hnek tlu tawh a, mahse, Liam a la tlawm mai bik lova round 9-naah Alvarez hian a knockout ta a ni.

Round kuanaah hian boxer pahnihte an chau tawh tih a hmuh theih a, Liam hian Alvarez hi ava hnaih a, Alvarez-a'n hun remchang alo zawng ve reng bawk a. Liam hian a lu a benna lamah a taksa dang a lo veng zo tawh lo a, hei tak hi Alvarez hian hun remchangah a hmang a a nak dinglamah a hnek a, Liam a tlu a tho tur a awm tawh lo. Referee-in inhnek a titawp zui ta a ni.

Kum 28 mi Smith chakloh tak avang hian hneh loh neilo record a neih lai mek chu a tawp ta a ni. Smith hian inhnek 24 a hmachhawn tawhah vawi 23 hnehna a chang a vawi khat a inhnehtawkpui a ni.

Inhnek a zawh hian Alvarez chuan, "kan inpeih e" tiin WBC, WBA leh IBF middleweight champion Gennady Golovkin(GGG) a cho nghal a ni.

Alvarez chuan, "Tumah ka hlau lo. He infiamnaah hian a tha ber ka ni a, a tha ber tho ka bei duh a ni. GGG hian ka chona hi a pawm duh lo a ni" tiin a sawi a.

Sawi chhunzawmin, "Thla kalta khan, GGG hnenah hian vawi thum vawi li vel lai min bei turin ka cho tawh a ni" tiin GGG a chona chungchang hi a sawi bawk a ni.

Alvarez hian a professional fight vawi 50-ah vawi khat chiah hnehloh ala nei a, chu chu American boxer Floyd Mayweather kha a ni, Mayweather a hneh lohna pawh hi points in a ni.

GGG hian hmanni lawk khan Kell Brook a hneh zo chiah a, a career-ah hneh loh ala tawng lova vawi 36 chakin vawi 33 lai knockout a nei a ni.

Alvarez hneh lotu Smith chuan, "Ka lawm lo hle a, Canelo hi a tha mah mah a ni. Ka hun a tawp" tiin a el phak loh thu a sawi a ni.

(adsbygoogle = window.adsbygoogle || []).push({});