Canelo Alvarez chuan kum nga chhung atan contract lian tham deuh a ziak a, infiamna khawvela contract to ber a la ni.

Mexican boxer rothap Saul Canelo Alvarez hi DAZN chuan kum nga chhung atan contract an ziahpui a, vawi 11 inhnek turin thuthlung a ziak a, a contract ziah hi £278 million ($365 million) hu vel zet a ni a. Infiamna khawvelah chuan contract ziah to ber a la ni a, 2014 a New York Yankees star Giancarlo Stanton-a’n Miami Marlins-a a awm laia £247 million contract a ziah chu a khum chiang hle.

Saul ‘Canelo’ Alvarez hian Las Vegas khawuiah Gennady Golovkin chu a hneh a, a lallukhum a laksak a. Hetianga a hlawhtlin hnu lawkah DAZN chuan thuthlung hi an ziahpui nghal vat a. DAZN hi tun hnaiah an che na hle a, kumin kum tir lamah pawh Eddie Hearn nen Matchroom USA chungchangah £1 billion contract an ziak tawh bawk a ni.

Contract thar a ziah hnua a hna hmasa ber tur chu December 15 hian a inher chhuak nghal dawn a, Madison Square Garden-ah British boxer Rocky Fielding nen an inhnek ang.

A hma zawnga Alvarez inhnek an tihchhuahna thin, US network HBO chuan kumin kum tawp atangin boxing tihchhuah tawh loh an tum a. A tlangpuiin HBO a pay-per-view ah hian US atanga entute chuan £60 vel an seng tlangpui a. Tunah chuan Canelo inhnek lai leh DAZN in infiamna an tihchhuah reng reng chu thla khata $9.99 chauh sengin an en thei tawh dawn a ni.

“Thawm lian tak nei chung leh bung thar kaia inremna ziahnaa ka tel ve thei hi a lawmawm mai bakah ka tan chuan chona thar tha tak a ni a. Hetianga boxing atana hmathlir thara min telh ve ngawt mai hi a zahthlak ka ti rum rum a. Boxing ngainatute tan chuan thil tha tak a inher chhuah ngei ka beisei,” tiin Canelo chuan a sawi.