02 Aug 2019 05:34

inkhel

Canelo Alvarez IBF title an hlihsak

Canelo Alvarez chu amah chotu nen an inbiak rem theih loh avangin IBF middleweight title a kawl lai chu an hlihsak.

Mexican boxer rothap Canelo Alvarez hian WBC leh WBA ‘super’ world title a kawl bakah kum May thlaah khan Daniel Jacobs a hneh a, IBF title a kawl tel bawk a ni.

Canelo hi IBF champion a nih takah chuan No. 1 rank ni mek Sergiy Derevyanchenko nen inhnek tura tih an ni a. Team pahnihte hi an inbe ngial a, hun tiam chhungin an inrem thei lo a, a hun an pawh sei hnuah pawh an inbiak rem theih tak loh avangin thil kalphung pangngai an zawm lo tiin Canelo IBF title kawl hi an hlihsak ta a ni.

Middleweight champion Canelo promoter Oscar De La Hoya chuan IBF in Canelo title kawl an hlihsak chu boxing tana thil zahthlak tak mai a nih thu a sawi chhuak a. De La Hoya hi a thinrim hle a, ngawih bo mai an tum loh thu sawiin, IBF chu dan hmanga khin ngei a tum thu a sawi.

Golden Boy promoter chuan, “IBF chet dan hi hriatthiam harsa kan ti hle a, khawvela fighter tha ber hetiang ringawta a title an hlihsak hi thil nih dan tur a ni lo. Sergiy Derevyanchenko promoter te nen inremna neih tumin ngawrh takin kan indawr mek a, chutiang a nih laia hetiang thil a thleng hi a dik thei lo a ni,” a ti.

“No. 1 rank meuh a nih avangin Sergiy Derevyanchenko te hnenah hian pawisa tam tham deuh kan tawktarh a, a nihna takah chuan Canelo nen inhnek hi an duh vak lo a ang hle a. Anni pahnih inhnektir ai chuan Canelo title hlihtir hi an tum ber ni maiin kan hria a ni,” a ti bawk.

A sawi zelnaah, “IBF chet dan hi boxing hmuhsitna lian tak a ni a, khawvel pumpuia boxing ngainatute thamlohna a ni bawk a. He thutlukna avang hian a hma atang tawha sawisel hlawh IBF dinhmun chu a hniam belh leh viau a ni,” a ti.

“Canelo khan Sergiy Derevyanchenko hnehtu Daniel Jacobs kha a hneh a, title a la a. Tuna fight dang a neih leh hmaa a title hlihsak ngawt mai hi thil nih dan tur a ni hauh lo a, dan behchhanin nasa taka hma lak ngei hi ka tum hle a ni,” tiin De La Hoya chuan a sawi.