Gaza City a football team pakhat chu football team dang ang an ni lo, naupang rual awm khawmna team niin, player te chu cancer vei vek an ni hlawm a. He team vang hian cancer vei naupang tam tak chuan beiseina thar an neih phah a ni.
Kum 14-a upa Moatasem al-Nabeeh chu a thluaka bawk awm vangin enkawl mek a ni a. An chhui chian hnuah cancer a ni tih hmuh chhuah niin, damdawi hmanga enkawl chhoh a ni a. Helai hmun vela cancer vei naupang dangte nen football team din tharah an tel a, he team hian heng naupangte hi beiseina thar a pe chho mek a ni.
Moatasem al-Nabeeh chuan, “Tunah chuan ka hlim phah tawh hle a. Football ka khel a, thian ka chhar thar teuh bawk a, ka nun a inthlak danglam sawt khawp mai,” a ti.
“Football kan khelh theih thu min hrilh a, inkhel thei turin min kaihruai a, cancer natna hi kan hneh thei a ni tih min hrilh a ni,” a ti bawk.
Gaza-a football zirna sikul lian ber pawl Champions Academy chuan thla nga kalta atang khan he team din tur hian hma an la tan a, kumin February thla khan ‘TEAM HOPE’ chu an tlangzarh tan a. Tun dinhmunah player 18 an awm mek a, heng player te hi kum 12 leh kum 17 inkar an ni hlawm a, an vai hian cancer natnain a tihbuai vek an ni hlawm.
Player te hi anmahni anga cancer vei ve bawk leh cancer vei lem lo te nen an inkhel thin a, an academy hian league an buatsaih thin a, chutah chuan team hrang hrangte chu an inel ve thin a ni.
Champions Academy CEO Rajab Sarraj chuan, “Gaza mai bakah khawvel hmun danga naupangte ang bawkin kan naupangte hian thil tum bik leh tihhlawhtlin chak an nei ve vek a. Heng naupang duhawm takte hian footballer nih an duh ve vek a, an duhthusam hi thlentir thei turin theihtawp kan chhuahpui mek a ni,” a ti.
Team Hope player te tan hian fee pek ve a ngai lo a, kar khatah darkar khat zel training an neihpui thin a. Training an neih zat tur hi doctor in tawk nia a hriat ang bak an neihpui ngai lo niin Rajab Sarraj chuan a sawi.
al-Nabeeh nu Suheir al-Nabeeh chuan a fapa chu football a khelh atangin nasa takin a danglam niin a sawi a, a rilru put dan a inthlak nasat bakah a nunphungah pawh hlim hmel hmuh tur a tam tawh hle niin a sawi a ni.
Suheir al-Nabeeh chuan, “A hma kha chuan rilru hnual takin a awm reng a, a khua a har ngawih ngawih reng bawk a. Football team an din hnuah chuan reiloteah a nun a inthlak danglam nghal vek a. Football a ngaina em em a, a inkhelh chinah chuan a nun chuan hlutna a nei niin a hre thar ve tawh a ni,” a ti.
Gaza hi Egypt leh Israel inrinaa awm niin, Palestinian maktaduai hnih bawr vel an khawsa mek a. Helai hmunah hian khawsak a harsa em em a, rethei tak tak an tam bakah hna nei lo an awm teuh a ni.
Damdawi leh bungrua duhthusam a awm lo a, Gaza damdawi in velah pawh cancer veite chu duh angin an enkawl thei thin lo a. Hei vang hian Israel emaw, West Bank emaw an panpui a ngai thin niin World Health Organization (WHO) chuan an sawi a ni.
Gaza-a damdawi in lian ber Shifa a chief oncologis Khaled Thabet chuan an khuaah cancer vei damlo enkawl ve thin mahse, damdawi leh hmanraw dangte an neih that tawk loh avangin hmun danga kalpui an ngai fo thin tih hi a sawi a ni.