Max Taylor chu thla 12 kaltaah khan cancer vangin chemotherapy hmanga enkawl a ni a, tunah chuan Europa League-ah Manchester United tana khel tur zingah a tel thei a ni.
Kum 19-a upa defender hian cancer inhnehtir mai a tum lo hle a, amah ang bawka he natnain a tihbuaite tan chona tha tak siam a duh a, a natna avanga a inenkawlna chu kalsanin Astana hmachhawn turin a pen chhuak ve ta a ni.
Manchester khuaa piang Max Taylor hi 2014 atang khan Manchester United ah a awm tan a, January 2018 ah khan Old Trafford-ah chuan professional contract a ziak tan ve chiah a ni.
United tana contract pangngai a ziah kum, 2018 ah harsatna lian tak maiin a tlakbuak nghal a, January thlaah contract hi a ziak a, beiseina sang tak a neih laiin August thlaah he harsatna hian a tlakbuak tan a ni.
A tilmu vei lamah bawk a awm a, chu chu a thang lian zel a. Damdawi thiam an entir a, an zai a, a tilmu vei lam chu an paihsak a, biopsy an lak atangin cancer a ni tih an hmu chhuak a. CT scan hmanga an en chuan a cancer chu a pum lampangah te, thalbe velah te a lo darh tawh bakah a chuapah pawh a kai tan tih an hmu zui a ni.
Taylor hi a cancer tih an finfiah atangin chemotherapy hmanga enkawl nghal a ni a. November 2018 atang khan kar 9 chhung chu chemo hmang hian enkawl a ni a, ni khatah darkar 8 te chemo hi a khai thin a ni.
Hetianga a inenkawl chhoh hnuah hian a taksaah cancer hnuhma an hmu zui lo a, chutih rualin a thalbe vung vel paih turin zai leh a ngai thung a ni.
“Khatiang lai vel kha chuan ka hma lam hun tur kha ngaihtuah ngaihna ka hre lo a. Kar 6 chhung chu chemo hnathawh reh hun kha ka nghak a ni ber a, ka pangngai thei mai lo a ni,” tiin Max chuan a sawi.
“Ka taksaah cancer hnuhma hmu zui lo mah se min zai avangin football ka khel leh nghal vat thei dawn lo tih ka hria a, ka lawm a kim chuang tlat lo a. Khatiang hun lai tluka hrehawm tih kha ka neih ka hre lo a. Ka pum an zai zo chauh a ni a, ka tho chhuak thei lo a, thut pawh ka thu chhuak thei lo a ni,” a ti bawk.
Kumin March thlaah khan darkar 5 leh a chanve chhung zet chu a thlabe vung vel paruk ngawt mai paih turin Max Taylor hi an zai leh a. May thlaah khan Aon Training Complex-ah a inlan tan a, zawi zawiin a insawizawi chho tan a ni.
September thla a inher chhuak a, Taylor chuan training pawh mumal zawkin a nei chho ve thei tawh a, kar hnih hnuah phei chuan a teammate te a zawm ve leh tan a ni.
October thlaah kum 19-a upa Max chu Manchester United Under-23 in 4-1 a Swansea an hneh tumin first half ah an luhtir ve a, a tawp thlengin a khel zui thei a ni.
November thlaah Max Taylor hi Under-23 team in 3-0 a Sunderland an hneh tumin substitute bench atangin an luhtir leh bawk a. Senior team lamah a vawi khatna atan Ole Gunnar Solskjaer chuan a thlang tel a, Kazakhstan lamah Astana nen Europa League khel turin a kal ve dawn a ni.