​Camp Nou-ah Red Devils an leng lut dawn

16th April 2019, 08:04PM

Ole Gunnar Solskjaer chuan a naute Camp Nou-ah a len luh pui dawn a, si khat phur sa in Manchester United chuan Barcelona hneh an tum dawn.

Champions League Quarter final first leg inkhelah team hnihte hi Old Trafford-ah an lo inhmachhawn tawh a, hemi tum hian Barcelona hi si khat faiin an chak. Barcelona hian away goal khat hlu tak an nei sa a, an kulh chhungah Manchester United chu pet thlak ngei an tum dawn.

Barcelona hian away goal an nei sa a, United lamin si an phur sa bawk nen, United tan Camp Nou-ah Barcelona hneh hi a awlsam dawn lova, mi tam tak chuan Barcelona hi semi final lut tur chiangsa ah an dah. Mahse United hian Round of 16-ah Paris Saint-Germain chu Old Trafford a si hnih faia an hneh loh hnu in Paris-ah an lehthall tawh avangin United hi sawi bo ngawt chi an ni bik lo.

Kar hmasa mai khan team hnihte hi first leg-ah an intum a, second leg an khelh hma hian league game pakhat ve ve an khel. Barcelona hian an player tha hahchawlh tir deuh vekin inrinni liamta khan Huesca an tlawh a, goal awm lovin an inhnehtawk. United erawhin an player tha dah tha ve lem lovin inrinni liamta khan West Ham an lo mikhual a, United hi 2-1 in an chak hram.

Team News:

Barcelona –in inhliam tharlam an nei lem lova, first leg-a inhliam Luis Suarez pawh a hliam a nat loh avangin second leg khel thei tura ngaih a ni a, Ousmane Dembele chu tun hnaiah a khelh tam tawk loh avangin Philippe Coutinho chu inkhel bul tan tura beisei a ni bawk.

Alexis Sanchez leh Nemanja Matic-te chu hun eng emaw chen an inhliam hnuah an khel thei dawn niin a langa, Barcelona-ah zin ve in inkhel bul erawh an tan thei dawn em a la hriat loh. Ander Herrera leh Eric Bailly-te an zin ve lova first leg-a own-goal tu Luke Shaw chuan first leg-ah yellow card a hmuh avangin second leg hi a awl a ngai dawn bawk.

Predicted line-up:

Barcelona- Ter Stegen; Semedo, Pique, Lenglet, Alba; Rakitic, Busquets, Arthur; Messi, Suarez, Coutinho

Manchester United- De Gea; Dalot, Lindelof, Smalling, Darmian; McTominay, Fred, Pogba; Rashford, Lukaku, Martial

Copyright © inkhel.com 2024. All rights reserved.