BVB an hneh loh hnuah Sevilla-in Lopetegui an ban

06th October 2022, 02:10PM

La Liga club Sevilla chuan, Champions League group stage-a Borussia Dortmund an hneh loh hnuah, an manager Julen Lopetegui an ban thu an puang.

Nilaini zanlai khan Sevilla hian an mikhual Borussia Dortmund chu 4-1 laiin an hneh lova, Champions League lama Sevilla dinhmun a chhe tan hle.

Khelh thum khelh tawhah Sevilla hian point 1 bak an la hlawhchhuak lova, Group G-ah pathumna niin, palina FC Copenhagen nen an point neih zat a inang. Group G-ah hian Manchester City chu hmahruaitu an ni a, point 9 neiin, point 6 nei Dortmund chu pahnihnaah an awm mek a ni.

Sevilla leh Dortmund inkhelah hian inkhelh tan atanga minute ruknaah Sevilla in goal an chhuah nghal a, Raphael Guerreiro chuan goal hmasa ber a khung a, Dortmund hma a hruaipui.

Half time hma lawkin Jude Bellingham leh Karim Adeyemi te chuan Dortmund tan goal an khung leh a, 3-0 in first half a tawp. Second half tir lamah Youssef En-Nesyri chuan Sevilla tan goal khung ve mah se, Julian Brandt chuan 75min-ah Dortmund tan goal a khung ve leh a, 4-1 in inkhel a tawp a, Spanish manager Lopetegui chuan a hna a chan zui ta bawk.

Kum 56 mi Lopetegui hi Wolves nena sawizawm an ni sa a, Sevilla in an ban leh ta bawk nen Wolves tan Lopetegui lakluhna hun tha a inhawng zau hle a, an dawr thuai a rinawm hle.

Sunday liamta khan West Ham an hneh loh hnuah, Wolves hian an manager Bruno Lage an ban a, manager thar an zawng mek a, tun Inrinnia Chelsea an hmachhawn hunah, Steve Davis leh James Collins te chuan Wolves hi an kaihruai dawn a ni.

Sevilla in an ban tak Lopetegui hian Spain, FC Porto leh Real Madrid te pawh a lo enkawl tawh a, kum 2019 atang khan Sevilla hi enkawl tanin, Europa League vawi khat a chawipui.

La Liga lamah pawh Sevilla hi an che tha lovam khelh sarih an khelh tawh atangin point 5 bak an la hlawhchhuak lova, 17-naah an awm mek a ni.

Sevilla hian Lopetegui thlaktu atan hian Jorge Sampaoli an la dawn niin a lang a, kum 62 mi hi Argentina head-coach hlui a ni.

Copyright © inkhel.com 2022. All rights reserved.