German club hlun Borussia Dortmund chuan Barcelona atangin striker Paco Alcacer chu loan-in an lalut.

Dortmund hian Alcacer hi tun season lo awm tur atan an hawh anga, nakkum lamah an duh chuan a ngheta lak an tum thei dawn. German club hian lalut duh mahse Barcelona hian an duh chuan hnar theihna a an nei bawk dawn a ni.

Loan-a an lak manah hian Dortmund hian euro makyaduai 2 an senga, nakkum lama an lalut duh a nih chuan kium li daih contract ziahpui theihna an nei nghal bawk.

A ngheta an lalut dawn a nih chuan Dortmund hian Spanish striker manah hian euro maktaduai 28 an sen a ngai dawn bawk a ni.

Nimin lam khan Alcacer hian Dortmund-ah medical neiin, a lut fel a, no.9 a ha ang.

Barcelona chuan thuchhuah siamin, “FC Barcelona leh Borussia Dortmund-te chuan Paco Alcacer-a chungchangah inremna kan nei a, 2018/2019 season chhung loan-in a kal ang. German club hian FC Barcelona hnenah hian loan-a an lak manah euro maktaduai 2 an pe anga, player hlawh an tum bawk ang,” an ti.

“Loan zawhah hian Dortmund hian euro maktaduai 23 leh thildangah euro maktaduai 5 sengin lakluh theihna an nei anga, Barcelona hian a duh chu chu a hnar thei bawk ang. Nakin hun zelah Dortmund hian Alcacer an hralh a nih chuan, an hralhna man atangin Barcelona hnenah 5% an pe ang,” an ti bawk.

Alcacer chuan Dortmund website hrilhin,”Bundesliga-a khelh thuai hi ka chak tawh a, khawvela league tha berte zinga mi a ni a,chuan Dortmund hian fan tha tak tk an nei a, chu chu footballer tan chuan a thlakhlelhawm em em a ni,” a ti.

Dortmund sport director Michael Zorc pawhin an player lakluh thar chungchang sawi ve in, “Paco Alcacer hian Borussia Dortmund zawm a thlang hi kan lawm em em a, ani ang player leh kan khelhdan hi a inmil hle bawkin kan hria a ni,” a ti.

Alcacer hian kum 2016 khan Valencia atang Barcelona hi pound maktaduai 27.3-in a zawma, kum nga daih contract a ziak. Barcelona tan hian vawi 51 inlanin, goal 15 a thun a, La Liga title pakhat leh Copa del Rey pahnih a chawi hman a ni.