06 Feb 2020 05:20

inkhel

Busby Babes chetsual champha

February 6, 1958 ah khan thlawhtheihna thlawk chhuak a chesual a, a chhunga chuang mi 21 zet chuan nunna an chan phah a, heng zingah hian Manchester United team player, Busby Babes an tih 7 chu an tel a ni.

Infiamna khawvel chu he thil thleng hian a nghawr nghing chiang hle a. Munich khawpuia Riem airport-a thil thleng hian tu te pawh a thawng a, kuminah he thil duhawm lo tak thlen atanga kum 62-naah pawh theihnghilh theih a la ni lo a ni.

Manchester United chuan European Cup an khel mek a, Belgrade khawpuiah Red Star Belgrade nen quarter final-ah an inkhel a, United chu chakin semi final an lut a. Busby Babes te chu mi reng rengin an beisei sang a, an champion theih ngei an ring hlawm hle a, British team zingah chuan European trophy la hmasa ber an nih theih ngei an ring a ni.

An inkhelh zawha BEA Airspeed Ambassador thlawhtheihna hmanga Belgrade, Yugoslavia an chhuahsan hnu hian Munich khawpuiah thlawhtheihna tui thun a ngai a, hei vang hian an chawl leh lawk a. An thlawh chhuak leh dawnah hian harsatna an tawk a, vawi hnih chu an hlawhchham phawt a. A vawi thumnaah chuan duh angin a tlan chak hman lo a, an chesual ta a.

Runway chu pelin in pakhat leh thingkung pakhat an su phei phawt a, chumi hnuah in dang a su leh a, thlawhtheihna chu a puak zui a, a chhunga chuang mi 23 zette chuan nunna an chan a, mi 21 te chu vanneihthlak tak maiin an thi ve ta lo a ni.

United manager Matt Busby chu dam chhuak zingah a tel a, ani pawh hi hun rei tak chu damdawi inah enkawl zui a ngai a. Manchester United player 7 ngawt mai chuan nunna an chan nghal a, heta nunna chan nghal te hi Eddie Colman, 21, Liam Whelan, 22, David Pegg, 22, Mark Jones, 24, Geoff Bent, 25, Tommy Taylor, 26 leh team captain Roger Byrne, 28 te an ni.

Player te bakah hian United backroom staff pathum chu nunna chan zingah hian telin, anni bakah journalist 8, crew member 2, passenger dang 2 te chu an thi ve bawk a. Manchester United player dang pakhat, Duncan Edwards chu an chetsual atanga ni 15 hnuah a hliam tuar loin a thi zui leh bawk a ni.

Dam chhuak zinga pahnih, Johnny Berry leh Jackie Blanchflower te chuan an chetsual hnuah hian football an khel zui leh ta miah lo a. Team manager Matt Busby chu thla hnih chhung ngawt damdawi inah an enkawl a, vawi hnih chu a thi dawn emaw an ti hman a, a hnuah erawh a dam chhuak ve leh ta thung a ni.

Hetih lai hian Manchester United team chu England ramah an vul hle a, 1956 ah an champion a, 1957 ah pawh an champion leh bawk a. An chetsual lai vel hian pahnihnaah an awm mek a, hmahruaitu Wolverhampton Wanderers chu point 6 in an pha rih lo a, game 14 khelh tur an la nei a ni.