Premier League inkhelah Chelsea chuan Stamford Bridge-ah Burnley an lo mikhual a, team hnihte hi 2-2 in an inhnehtawk.
Mual neitu lam Chelsea tan N’Golo Kante leh Gonzalo Higuain-te chuan goal an khunga, Burnley tan hian Ashley Barnes leh Jeff Hendrick-te chuan goal an khung ve bawk.
Khelh 35 atangin Chelsea hian point 67 an hlawhchhuak tawha, pangana atangin palina-ah an chho. Chelsea hi an chung chiahah awm Tottenham nen an point neih zat a inang chiaha, an hnuai chiaha awm Arsenal aiin point khatin sang zawk bawk mahse, heng team hnihte ai hian Blues hi khelh khatin an khel tam zawk.
An game hnuhnung berah palina hmun inchuh mek team palite an chak zo lo veka, Manchester United, Arsenal leh Tottenham-te chuan an tumpuite hneh lo vekin Chelsea hi an chak zo lo bawk. Midang an chak lo veka, Chelsea hian pathumnaa lawn chhohna hun tha tak nei mahse point thum an hlawhchhuah zawh bik loh avangin palinaah an awm a ngai ta a ni.
Chelsea 2-2 Burnley
(Kante 12’, Higuain 14’) (Hendrick 8’, Barnes 24’)
PLAYER RATINGS
Chelsea: Kepa 6, Azpilicueta 6, Luiz 6, Christensen 6, Emerson 7, Jorginho 7, Kante 6, Loftus-Cheek 6, Hudson-Odoi 6, Hazard 7, Higuain 7. Subs: Pedro 7, Kovacic 6, Giroud 6.
Burnley: Heaton 6, Lowton 7, Mee 8, Tarkowski 8, Taylor 7, Hendrick 7, Cork 7, Westwood 7, McNeil 6, Wood 7, Barnes 7.
Match Report
Chelsea hian 4-3-3 formation an hmanga, khawvelah goalkeeper manto ber Kepa Arrizabalaga chuan si ban nghakin defence-ah Cesar Azpilicueta, Andreas Christensen, David Luiz leh Emerson-te an intlar. Midfield-ah Sarri-a fachuam Jorginho, Kante leh Ruben Loftus-Cheek te awmin, hmatawngah Higuain, Eden Hazard leh Callum Hudson-Odoi te dah an ni bawk.
Burnley lamin 4-4-2 formation an hmanga, Tom Heaton chuan si ban a nghak. Defence-ah Lowton, James Tarkowski, Ben Mee leh Taylor-te awmin midfield-ah Jack Cork leh Ashley Westwood-te an inkawp bawk. A sirah McNeil leh Hendrick-te awmin hmatawngah Barnes leh Chris Wood-te an inkawp.
Inkhel tan a ni a, inkhel a hmuhnawm thawkhata, goal pawh a lut duh angreng hle. Inkhelah goal li lai lut mahse darkar chanve pawh khelh a nih hma a lut vek an ni a, inkhel tan tir lamah goal mawi tak tak hmuh tur a awm nghal.
Chelsea hian inkhel tan tir lamah chance tha tak tak vawi hnih vel nei nghal mahse mikhual lam Burnley in hma an hruai hmasa a, Henrick chuan box pawn atangin mawi takin Chelsea goal-ah ball a volley luta, Stamford Bridge-ah mikhual lamin minute sawm pawh khelh a nih hma in hma an hruai.
Burnley-in hma an hruai atanga minute nga pawh a liam hma in Chelsea chuan an si phurh an sut nghal. Hazard chuan Burnley box chhungah ball chawkin, defender a bum hnuah box chhung goal hmazawna awm Kante a pe , Kante hian goal-ah a lo khunga, 1-1 a ni.
An goal hmasa zawk an khung atanga minute hnih hnuah Chelsea in hma an hruai zuia, Burnley box chhungah Higuain leh Azpilicueta-te chuan ball an inpe, Higuan hian dinglam atangin kawh em em in goal-ah pet lut a, minute 15 pawh khelh tlin a nih hma in Chelsea chuan 2-1 in hma an hruai.
Chelsea hmahruai atanga minute sawm hnu velah Burnley lamin goal an khung ve leh a, set piece atanga Chelsea box chhunga ball an vawrh luh chu Burnley hian an hmang tangkai hle a, box chhunga ball lo lut chu McNeil chuan lo tauhin Wood chuan a lo tauh ve leh a, far post lama changtu neilo Barnes chuan ball changin goal-ah a khung zui a, 2-2 a ni.
First half-ah hian Chelsea rawlthar duhawm tak Hudson-Odoi chu a inhliam a, lakchhuah niin a aiah Pedro dah luh a ni. Hudson-Odoi hi tun season-ah a khel kan hmuh leh a rinawm tawh lova, Chelsea tan leh a tan pawh a pawi thui viau thei a, first team a chang chho tan mek tihah tianga a inhliam ta mai hi a pawi hle. First half-ah hian Chelsea-in inkhel an thunun a, chance pawh nei nualin Loftus-Cheek chuan box pawn atangin Burnley goal-ah ball a chhuih lut teuh viau bawk. 2-2 in first half hi tihtawp a ni.
Second half khelh a ni a, Chelsea lam an hlauhawm nghal; minute ruk vel khelh a nihin Hazard chuan veilam atanga ball lalutin Pedro a pe a, Pedro hian Higuain a pe ve leha, Argentine striker hian goal-a ball pet luh tum mahse Heaton chuan a lo save.
70mins khelh a nih hma deuhin Emerson chuan Higuain-a tan ball a cross a, mahse Higuain hian lo khawih lovin ball a tlang tir a, Azpilicueta chuan changin goal-ah pet mahse Heaton bawk chuan a lo save leh. Burnley hian hun an khawhral lui nasa in a langa, an na deuh reng a tih theih. Hun tawp hnaih lamah pawh Burnley player-te an tlu deuh renga, inkhel kaltluang lai chu a khat tawka tihtawp ngai zeuh zeuh reng mahse inkhel tluanin Burnley lam hian substitution vawi khat pawh an hmang lo thung.
Chelsea hian goal thun belh tumin Burnley an nawr nasa a, Burnley lam erawh point khatah an lung a awi tih a lang chiang thung. Burnley an khawng tluan thei a, inkhel hi 2-2 in a tawp a, point khat ve ve team hnihten an hlawhchhuak ta a ni.